Nyuma ya Sabrina, indirimbo Kayihura yakoranye na Kivumbi yakunzwe cyane yaje kujya mu irushanwa rya Prix décovertes RFI, Kayihura yakoze indirimbo ivuga ku bihe bigoye abantu barimu.

Iyo ndirimbo yakorewe amajwi na producer Madebeat, amashusho agakorwa na Girishya Serge, ni yo Kayikura yashyize hanze mu muzingo w’indirimbo (Extended Play List) arimo gukora. Uwo muzindo witwa “Zuba”, uzaba uriho indirimbo umunani (8) yiteguye gusohora muri uyu mwaka wa 2021.

Kayihura mu kiganiro n’itangazamakuru, yavuze ko yishimira gukorana n’itsinda ry’abamufasha gukora umuziki, kurusha uko yakorana n’inzu zikora umuziki (record label).

Kalisa Darius uharanira inyungu za Kayihura, avuga ko ibyo bifasha umuhanzi kumva ko ari we nyir’ibihangano.

Ati “Usibye kuba inzu zitunganya umuziki zigira byinshi zisaba, ariko iyo umuhanzi akorana n’itsinda rye, icyo gihe umuhanzi aba afite uburenganzira 100% ku bihangano bye”.
Muri Prix de la découvertes RFI 2020, Kayihura yari yageze mu bahanzi 10 bari basigaye bahatanira icyo gihembo ari na ho yaviriyemo.