Nyuma ya album « Intashyo » na «Le Rebelle », JAH BONE D, usanzwe uzwi ku izina rya DARIUS ROUROU amaze gushyira ahagaragara album ye ya 3 yitwa LOVE CAMPAIGN – idiski igizwe n’indirimbo 12 zo mu njyana ya REGGAE.

Ku maradiyo yo mu Busuwisi bamuzi cyane cyane mu ndirimbo za reggae-nyarwanda nka : SI ABANTU, HINDURA n’izindi kuko zikubiyemo ubutumwa kandi zinogeye amatwi.

Inararibonye rya JAH BONE D mu muziki, mu buzima bwa buri munsi cyane cyane i Burayi aho umwirabura atungwa agatoki uko bwije uko bukeye, urukundo rwa kivandime kuko arirwo soko y’amahoro , ni byo biranga Album nshya LOVE CAMPAIGN .

Izo ndirimbo zikubiyemo ubutumwa kandi zinogeye amatwi nka : Palestine, Genocide, France cyangwa izigaragaza ukwizera n’ukwemera guhambaye nka : Ma Shepherd, Impuhwe, Justice, Love is a solution n’izindi ziranga ubwiza n’ibigwi by’u Rwanda nka : Gasabo cyangwa « Fille du Rwanda »…

JAH BONE D yatangiye kugira ubuhanzi umwuga mu mwaka 1995 amaze guhura n’abacuranzi bo mu Ingeli band y’i Kigali. Hanyuma yaje gukomereza mu Burayi cyane cyane mu Busuwisi ari naho atuye. Yakoranye n’abahanzi bo muri Kirwa cya JAMAYIKA bo mu rwego rwo hejuru kandi bazwi mu njyana ya Reggae nka RICO RODRIGUEZ umu-trombonist w’Icyamamare.

Rico yamenyekanye ubwo yavuzaga muri band yitwa THE WAILERS iruhande rwa BOB MARLEY. JAH BONE D kandi yashyikiranye by’umwihariko na za « bands» n’abahanzi bazwi barimo YANNICK NOAH, SKATALITES, LEE S. PERRY n’abandi…

Kigalitoday