Izi ndirimbo ntizivugwaho rumwe: Bamwe bazita “ibishegu” abandi bati “Ni ubuhanzi”

Hashize iminsi hasohoka indirimbo zitandukanye, abazumva bakavuga ko harimo amagambo y’ibishegu cyangwa se amagambo y’urukozasoni, abandi bakavuga ko ntacyo zitwaye ahubwo ko ari imyumvire y’abantu itandukanye.

Izi mpaka zikunze kuvugwaho n’abantu batandukanye baba abayobozi, abahanzi bashyirwa mu majwi ndetse n’abazumva.

Umunyamabanga wa Leta muri Minisiteri y’Urubyiruko n’Umuco, Edouard Bamporiki, ubwo yari kuri Radio 10 aherutse gutangaza ko yasezera ku mirimo ye aho kugira ngo Minisiteri abarizwamo inafite mu nshingano umuco itere inkunga umuhanzi uririmba bene izi ndirimbo.

Bamporiki yavuze ko abahanzi bakora izo ndirimbo hari byinshi bononera u Rwanda ndetse na bo batiretse. Ibyo ngo bashobora kubihanirwa n’amategeko, cyane ko baba biyima n’amahirwe yo kuba hari ubufasha runaka bw’igihugu bahabwa.

Ku rundi ruhande, bamwe mu bahanzi bo si uko babyumva. Bruce Melody, umwe mu batungwa agatoki,avuga ko izo ndirimbo ari zo abantu bakunda kandi ko abahanzi bose bataririmba iza gakondo.

Ati “Ese twese twaririmba indirimbo zivuga umuco ngo bikunde? Abahanzi dukora indirimbo zitandukanye twese bitewe n’inganzo ya buri wese, kandi izo ndirimbo bita ibishegu ni zo abantu bakunda kandi zicuruza. Wowe uri umuhanzi urumva wabigenza ute? Ariko abazumva nibatazikunda nzajya muri gakondo.”

Platini mu ndirimbo ye “Fata Amano” na we yatunzwe agatoki ariko avuga ko ibishegu biri mu buvanganzo rw’ururimi nyarwanda atari abahanzi b’ubu babizanye. Yagize ati “Erega ibi bita ibishegu si twe tubihimbye ni ibintu bisanzwe mu muco nyarwanda, ahubwo niba biri mu ndirimbo abazicuranga bagakwiye kuziha amasaha akwiriye naho kuzica si igisubizo.”

Umuhanzi Davis D na we ibihangano bye muri iyi minsi ntibivugwaho rumwe, dore ko guhera ku ndirimbo yise Dede, Micro ndetse n’iherutse kujya hanze yitwa Ifarasi zose hari abavuga ko zirimo amagambo y’urukozasoni. Icyakora uyu muhanzi we avuga ko izo ndirimbo zifite imvugo izimije bigatuma abantu bazumva mu buryo butandukanye, kuri we agasanga ubwo ari bwo buhanzi.

Ati “Njye nk’umuhanzi nkora indirimbo. Abantu iyo bayumvise mu buryo butandukanye ntacyo bintwara. Niba mvuze ‘Micro’ hari uwumva indangururamajwi undi akumva iyi ya radio yewe abandi bakumva ibindi. Rero kuba nta magambo mabi arimo ndumva nta kibazo kirimo. Abumva amabi ni uko bo ubwabo baba babyiyumviye.”

Abiganjemo urubyiruko usanga ari bo bumva cyane izi ndirimbo. Umwe muri bo witwa Bankurikire Ange w’imyaka 23 we asanga ingaruka zazo ari nke kurusha uko babyumva.

Ati “ Ntawumva izi ndirimbo ngo ahite ajya gusambana cyangwa ikindi, ubikora n’ubundi aba yabitekerejeho na mbere. Akenshi usanga tuzikundira injyana. Abo bana bavuga ko zabangiza yewe abenshi baba basubiramo amagambo bafashe mu mutwe ariko ntibanumva ubusobanuro bw’ibishegu dore ko akenshi bivugwa mu mu buryo bujimije.”

Izi mpaka kugeza ubu nta mwanzuro zirabonerwa, dore ko zikomeza kugaragara haba ku mbuga nkoranyambaga ndetse n’ahandi mu biganiro. Ni nako kandi abahanzi bakomeza kumvikana bahimba izindi ndirimbo ziri muri ubwo buryo bamwe bita urukozasoni.

Izi ni zimwe muri izo ndirimbo. Wowe bene izi ndirimbo uzivugaho iki?

Shakisha izindi nkuru
kigalitoday android app mobile

Ibitekerezo   ( 2 )

Icyakubwira ukuntu zikunzwe ntihagire ubitindaho isi dutuye n iy ubusambanyi gsa, Ntagushidikanya biriya ni ibishegu gsa gsa!

NJEBON yanditse ku itariki ya: 21-10-2020  →  Musubize

Ubwo nawe uramamaje rero ntugasekwe

gadore yanditse ku itariki ya: 20-10-2020  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka