Ni igitaramo kinyuzwa ku murongo wa Youtube kikamara hagati y’isaha imwe n’ebyiri mu rwego rwo kumara irungu abantu bakunda umuziki badaheruka ibitaramo.

Ubwo twavuganaga ku murongo wa telefoni, Igor yagize ati “Niteguye gushimisha abantu bari bube bankurikiriye mu rugo nkabamara irungu, kuko uburyo bwo gukorera kuri interineti burimo burifashishwa cyane mu gususurutsa abantu mu bitaramo”.

Abajijwe niba mu gitaramo nk’iki hari amafaranga ashobora kuvamo agahabwa umuhanzi, Igor Mabano yagize ati “Barishyuye rwose. Ba nyiri iriya channel tuzakoreraho barishyuye, ariko umubare sinawumenya buriya bavuganye na Management yanjye ariko barishyuye”.

Igor yavuze ko muri ibi bihe byo kuguma mu rugo, abafite imirongo ya YouTube bagiye bishyura abahanzi kuri ibi bitaramo byaba ari ibintu byiza, ahubwo agasaba ko ibi bitaramo bigiye bibaho kenshi muri iki gihe byafasha abahanzi cyane.

Igor avuga ko muri iki gitaramo bakora ibishoboka byose bakubahiriza amabwiriza yo kwirinda Covid-19, kugira ngo iki gitaramo cyabo na cyo kitaza guhagarikwa nk’uko byagendekeye itsinda rya Tuff gangs, ubwo igitaramo cyabo cyasubikwaga ubugira kabiri kubera kutubahiriza aya mabwiriza.

Nubwo Igor Mabano agiye gukora iki gitaramo cyiswe “Urakunzwe”, avuga ko atabyita kumurika album nk’uko yari yabiteguye mu kwezi kwa Werurwe, ahubwo ko icyorezo cya Covid-19 nikimara kujya uruhande rumwe azategura ikindi gitaramo kinini abantu bari hamwe.