Itsinda ‘Benegihanga’ ryatoranyijwe mu matsinda atanu yitwaye neza mu cyiciro cya mbere cy’amarushanwa, ubu bakaba bagiye kongera kurushanwa n’abo bandi bane bahanganye nabo, ari naho hazavamo umuhanzi cyangwa itsinda rya mbere rizegukana umudari wa zahabu.

Itsinda ‘Abenegihanga’ rigizwe na Ibrahim Nahimana akaba ari nawe uriyoboye, Mani Martin, Ntizatureka Didier, Christian Ngirinshuti, Munyarugerero Gerard na Ndengera Fabrice.

Abo ni abahanzi bagize itsinda ’Benegihanga’. Ufite inanga ni Nahimana Ibrahim Umuyobozi waryo.

Mani Martin avuga ko, n’ubwo abo bahanganye ari abahanga cyane ariko ngo, we na bagenzi be bafite icyizere cyo gutsinda abo bahanzi bandi.

Ati “Ni ubwa mbere u Rwanda rwitabira iyi mikino mu rwego rw’indirimbo, ariko abantu benshi bashimye uko twaririmbye, ndetse icyo cyizere cyagaragajwe n’uko twatoranyijwe mu bahanzi batanu ba mbere.

Harimo abandi bahanzi b’abahanga cyane ariko natwe tumeze neza, ubu turimo kwitegura kandi umwihariko wacu w’uko twibanda ku muco kandi tukaba tukiri batoya, biraduha amahirwe yo kuzatsinda”.

Mani Martin ni umwe mu bagize itsinda "Abenegihanga".

Abahanzi batanu basigaye bahanganye n’itsinda ‘Abenegihanga’ rihagarariye u Rwanda, ni abakomoka muri Haiti, Liban, Autriche na Burkina Faso. Aba batanu barokotse mu bahanzi baturutse mu bihugu 20 bitabiriye aya marushanwa.

Iri tsinda ryatsindiye kujya mu Bufaransa nyuma yo kwitwara neza bagatsinda abandi bahanzi bo mu Rwanda ndetse no mu karere aho bahatanaga n’abahanzi bo mu Burundi no muri Djibouti.

Theoneste Nisingizwe