Mu buryo busa no guca agahigo, Rubavu niko gace kamaze guturukamo ba nyampinga babiri bikurikiranya, bambaye ikamba rya Miss Rwanda. Abo ni Miss Mutesi Jolly 2016, n’uwo yahaye ikamba, Miss Iradukunda Elsa 2017.

Ni nako gace kagiye kavamo abanditse amazina muri iri rushanwa, barimo nka Miss Hirwa Honorine wamamaye nka Miss Gisabo, wanambitswe ikamba rya Nyampinga ukunzwe n’imbaga mu marushanwa ya 2017.

Aha kandi hakomotse Shimwa Guelda igisonga cya 2 cya Miss Rwanda 2017, umwe mu bakobwa bagaragaje gusubiza mu buryo bwihagazeho, uhereye mu majonjora kugera ku munsi wa nyuma w’irushanwa ry’umwaka ushize.

Uyu mujyi ufatwa nk’uw’ubukerarugendo, ni nawo wakomotsemo Uwamahoro Natasha, wabaye Igisonga cya Miss Rwanda 2012, kubwa Aurore Kayibanda. Uyu Natasha yari yaranigeze kuba Nyampinga w’icyahoze ari Ishuri rikuru ry’imari n’amabanki (SFB) mbere yo kwitabira Miss Rwanda.

Rubavu imaze kuba nk’igicumbi cy’amahirwe y’abakobwa bahatanira iri kamba, igiye gukorerwamo amajonjora y’ibanze ku gicamunsi cyo kuri uyu wa 14 Mutarama, hatoranywe abazahatana n’abandi bakobwa baturutse mu gihugu hose.

Amakuru agera ku munyamakuru wa Kigali Today, aravuga ko mu barenga 100 biyandikishije mu gihugu hose, imyirondoro y’abarenga 20 ari iy’abiyandikishirije mu burengerazuba.