Anita Pendo yaba atwite yitegura no kwibaruka

Anita Pendo, umushyushyarugamba n’umunyamakuru yakunze gutangazwaho ko atwite ariko akanyomoza ibyabaga byatangajwe avuga ko atari ukuri.

Kuri ubu nabwo ntiyemera cyangwa ngo ahakane ko atwite ahubwo avuga ko mu minsi iri imbere azatangaza ukuri; nkuko yabibwiye Kigali Today.

Agira ati “Mu gihe cya vuba nzababwira amakuru y’ukuri, muri iyi minsi ndifashe mu kuba nasubiza ikibazo nk’icyo.”

Gusa ariko amakuru avuga ko Anita Pendo yaba atwite yemeza ko agiye kubyarana n’umukunzi we bamaranye iminsi witwa Nizeyimana Alphonse Ndanda umwe mu banyezamu ba AS Kigali wayigiyemo avuye muri Mukura VS.

Andi makuru kandi avuga Anita wari usanzwe akora ibiganiro kuri Tereviziyo yaba yarabihagaritse bitewe nuko yaba atwite.

Ariko we avuga ko atakwanga kujya kuri tereviziyo kubera ko atwite. Ahamya ko umwana ari umugisha kuri we.

Avuga ko ahubwo muri iyi minsi agifite intege nke bitewe n’uko aheruka mu bitaro. Ariko ngo mu mezi ya vuba akaba agomba kugaruka.

Nizeyimana Alphonse Ndanda umukunzi wa Anita Pendo (Photo Internet)

Anita Pendo ni umwe mu bashyushyarugamba bakomeye mu gihugu. Azwi cyane mu irushanwa rya Primus Guma Guma Super Star.

Ni umwe mu bakobwa bake bazwiho ubuhanga mu kuvangavanga imiziki (DJ), akaba ari n’umwe mu banyamakuru bakunzwe.