Abasore bagize itsinda rya Two 4Real hamwe n’umuhanzi ukiri mushya muri muzika Syntex akaba n’umuvandimwe w’umunyarwenya Arthur Nkusi bazakorana igitaramo muri Kaizen Group aho bizaba biri mu rwego rwo kwimenyekanisha ku ruhande rwa Syntex ndetse no kwiyegereza abafana ku ruhande rwa Two 4Real.

Syntex, murumuna w’umunyarwenya Arthur Nkusi mu gitaramo n’itsinda Two 4Real.

Syntex Calabash ari na we wateguye iki gitaramo afatanyije na Kaizen Club abinyujije muri studio ye “African Calabash” yadutangarije ko iki gitaramo yitiriye indirimbo ye nshya “Ntabyubuntu” ngo kitagamije inyungu y’amafaranga.

Yagize ati “Nubwo kwinjira bizaba ari amafaranga, inyungu nyamukuru kuri njye ni uko nzabasha kwigaragariza abafana banjye batari bambona.”

Kwinjira muri iki gitaramo kizatangira ku isaha ya saa yine z’ijoro bizaba ari amafaranga y’u Rwanda ibihumbi bibiri (2000Rwf) kuri buri muntu.

Abahanzi bazaba baje kwifatanya na Two 4Real ndetse na Syntex harimo itsinda rya TBB, M Izzo, Lanie, Magic Star, Khalfan, Pacento, Sky Line, Sama Boyz, Ivoleson Calabash, City Yankeez n’abandi.

Marie Clemence CYIZA UWIMANIMPAYE