Nyuma y’iki gikorwa abantu benshi bakomeje kunenga uko cyagenze n’imitegurire yacyo nyamara uyu mwaka hari ibigo bibiri (Rwanda Inspirations Back Up na East African Promoters) byegukanye isoko ryo kugitegura kugirango kigende neza kurusha umwaka ushize.

Bimwe mu bivugwa ko bitagenze neza mu itorwa rya Nyampinga w’u Rwanda 2014 harimo kutubahiriza igihe aho iki gikorwa cyatangiriye ku isaha cyari giteganyijwe kurangiriraho, ibi bikaba byaratumye benshi mu bari bacyitabiriye barambirwa ndetse bamwe bagahitamo kwitahira.
Iki gikorwa kandi cyamaze amasaha menshi cyane birenze, ibi nabyo bikaba byaratumye bamwe bataha bitarangiye.

Habayeho guhuzagurika muri gahunda, ndetse n’abashinzwe kwicaza abantu ntibabikora uko bikwiye. Ibi byatumye bamwe mu bayobozi batabona ibyicaro, abandi bicara aho batari bakwiye kwicara.

Iki gikorwa kandi byagaragaye ko nta muyobozi mukuru wahawe ijambo cyangwa se wahawe umwanya wo kuvuga ijambo mu gihe bimenyerewe ko igikorwa nk’iki hagomba kubamo ijambo ry’umuyobozi umwe cyangwa barenze umwe bijyanye na gahunda iba yateguwe.

Imitegurire y’ahabereye ibirori nayo yarakemanzwe cyane. Imyambrire y’abakobwa bahataniraga kuba Nyampinga w’u Rwanda nayo yarakemanzwe kuko byose ntaho byagaragazaga umuco nyarwanda.

Uburyo abateguye iki gikorwa batahaye umwanya abaterankunga b’iki gikorwa nabyo byababaje benshi. Ubusanzwe iyo umuntu ateye inkunga igikorwa aba afite nawe ibyo yifuza nko kwamamaza ibikorwa bye cyangwa se kuvugwa kenshi mu rwego rwo kugira ngo nawe yumve yishimiye koko icyo gikorwa.

Nyampinga Akiwacu Colombe yambikwa ikamba na Nyampinga ucyuye igihe, Aurore Umutesi.

Ikipe yari ishinzwe protocol nayo ntiyabashije gukora neza akazi kabo ndetse ntibabashije no kwerekera abaza kwambika amakamba ba Nyampinga bityo birabananira. Uburyo ba Nyampinga bari babasize ibirungo (Make up) n’uburyo bari basokojwe nabyo byaranenzwe cyane.

Abahanzi baririmbye hariya nta kintu cyagaragazaga umuco mu gihe byari kuba byiza iyo wenda hatumirwa itorero ribyina Kinyarwanda cyangwa abahanzi baririmba umuco. Abahanzi bari bahari bazi kuririmba nabo ntibahawe ibicurangisho.

Isuku nke y’ubwiherero bwari buri gukoreshwa bigaragara ko hatari hatunganyijwe mbere y’uko ibirori bitangira, ibi bikaba byarabangamiye cyane abari bicaye mu myanya y’icyubahiro. Abashyushyarugamba nabo barakemanzwe kuko batitwaye neza ubona basa n’abahuzagurika.

Nta gikorwa kibura ibyo bakinenga ariko iki gikorwa cyo gutora Nyampinga w’u Rwanda ni igikorwa cyagakwiriye kwitonderwa cyane ko kiba ari igikorwa kiri ku rwego rw’igihugu, cyitabirwa n’abantu bakomeye mu gihugu kandi utowe akaba agomba guserukira igihugu hirya no hino.

Marie Clemence CYIZA UWIMANIMPAYE