Alain Delon mu mwuga wa filimi yafatwaga nk’umugabo mwiza kuruta abandi mu myaka ye y’ubusore

Nyakwigendera Delon yari amaze iminsi afite ibibazo by’ubuzima ku buryo atari akigaragara mu ruhame. Mu cyumweru gishize, agahinda n’icyuho byatejwe n’uyu mugabo mu gihe yari amaze atagaragara byavuzweho cyane mu binyamakuru byo mu Bufaransa.

Brigitte Bardot bakinanye muri filimi nyinshi, ku Cyumweru yavuze ko urupfu rwa Delon rusize icyuho kitazabona umuntu cyangwa icyo ari cyo cyose gishobora kukiziba.

Mu myaka ye y’ubusore, Delon yafatwaga nk’umugabo mwiza cyane kuruta abandi muri filimi; yatangiye kugaragara muri uwo mwuga ahagana mu 1960, ahereye ku yamenyekanye cyane yitwa Le Léopard mu 1963.

Alain Delon yigaruriraga imitima y’abakunzi be kubera icyo yabaga yahawe gukinamo icyo ari cyo cyose, uhereye ku mwicanyi kugeza ku muntu w’umwambuzi ukoresha akarimi gasize amavuta, aka ya ndirimbo ya nyakwigendera Mwitenawe Augustin ivuga iti "Umugabo w’umwambuzi burya asa n’uwamize urusoni, akenyeye ukuri yiteye uburyarya iyo yakwitumye".

Guhera mu myaka ya za 90, ntiyongeye kugaragara kenshi muri filimi ariko yakomeje kuguma mu ruhando rw’ibyamamare by’ibihe byose.

Alain Delon yari atakigaragara mu mwuga guhera mu myaka ya za 90

Alain Delon witabye Imana azize izabukuru ku myaka 88, yakinnye muri filimi zibarirwa muri 90 mu gihe cyose yamaze muri uwo mwuga.

Perezida w’u Bufaransa Emmanuel Macron ni umwe mu bunamiye Alain Delon, avuga ko yakinnye muri filimi zakahanyujije zatumye isi yose yibera mu nzozi.

Mu butumwa yanditse kuri X, Perezida Macron yagize ati "Urukumbuzi, ikimenyabose, umuntu w’ibanga cyane, yari arenze kuba icyamamare: Yari ishusho y’u Bufaransa."

Usibye gukina filimi, Alain Delon yanafatanyije n’umuhanzikazi Dalida mu ndirimbo yitwa Paroles, aho yumvikanamo mu kijwi kinini asa n’uganira.

MENYA UMWANDITSI

Gasana Marcellin

Umunyamakuru

@ Gasana_M

Reba inkuru zose nanditse ( 587 )