Volleyball: Shampiyona igarukanye n’icakirana ry’ibihangange
Shampiyona ya volleyball mu cyiciro cya mbere, iragaruka kuri uyu wa gatanu taliki ya 17 Mutarama 2025 hakinwa imikino yo kwishyura (return leg)

Iyi mikino irabanzirizwa n’imikino ikomeye izahuza amakipe ya REG VC izesurana na Police vc mu cyiciro cy’abagabo naho mu cyiciro cy’abagore ikipe ya RRA icakirane na Kepler wvc.
Ni shampiyona yari imaze ukwezi igice cya mbere kirangiye, aho yasize amakipe ya POLICE VC mu bagabo iyoboye urutonde rwa shampiyona n’amanota 21 mu gihe mu cyiciro cy’abagore, ikipe ya RRA ariyo yasoje imikino ibanza n’amanota 19.
Aya makipe yombi ahuriye ku kuba ataratsinzwe umukino n’umwe mu mikino ibanza.
Ni iki cyo kwitega mu mikino yo kwishyura
Agace ka mbere ka shampiyona ya volleyball karanzwe n’ihangana rikomeye ndetse no gutungurana ku makipe amwe.
Ikipe ya Gisagara volleyball club yongeye kwisanga hanze y’amakipe 4 (Big 4) naho ikipe ya EAUR itanga ubutumwa nyuma yo gutsinda amakipe akomeye arimo nka APR VC ndetse na Gisagara VC.
N’ubwo nta mpinduka nyinshi zakozwe mu makipe yose, hari amwe mu mazina mashya muzabona muri shampiyona ndetse akomeye.

Meldinah Nemali Sande ukomoka mu gihugu cya Kenya, ni umukinnyi witezwe cyane muri iyi mikino yo kwishyura aho azaba afasha ikipe ya Police Women volleyball club kureba ko yakwegukana igikombe cyayo cya mbere cya shampiyona y’u Rwanda nyuma y’imyaka 3 ishinzwe.

Anier Diaz Herrera ukomoka muri Cuba, ni irindi zina ryo guhanga amaso aho yongerewe mu ikipe ya Kepler VC y’umutoza Nyirimana Fidele nawe utaregukana igikombe cya Shampiyona ari kumwe n’iyi kipe ya Kaminuza.
Mu zindi mpinduka zakozwe mu makipe mbere y’uko imikino yo kwishyura itangira muri shampiyona ya volleyball, ni nk’aho uwari umutoza w’ikipe ya Gisagara VC Ykana Guma Laurence yatandukanye n’iyi kipe agasimburwa n’uwari umwungirije Ndahiro Joseph aho nawe azungirizwa na Emmy Bonane.

ikindi, umukinnyi w’Umurundikazi umaze igihe mu Rwanda Mutini Berthille ahinduriwe inshingano ubu ntakiri umukinnyi wa Police vc ahubwo yagizwe umutoza ushinzwe imibare (statistics).
Kwizera Eric umwe mu bakinnyi beza ikipe ya POLICE VC ifite, ni umwe mu bakinnyi bazatangira imikino yo kwishyura batekanye nyuma yo kongera amasezerano y’imyaka ibiri ari muri iyi kipe y’igipolisi.

Ohereza igitekerezo
|