Volleyball:Gisagara yatsinze REG, Kirehe isoza imikino ibanza nta ntsinzi

Yanditswe na

Isaac Kuradusenge

19-01-2020 - 13:45' | Ibitekerezo ( )

Imikino isoza igice kibanza muri Volleyball yasojwe kuwa Gatandatu tariki ya 18 Mutarama 2020, ikipe ya Gisagara VC itsinda REG VC amaseti 3-2, mu gihe Ikipe ya Kirehe VC yatsinzwe na IPRC Ngoma amaseti 3-1 isoza imikino ibanza nta mukino n’umwe itsinze.

Ku mugoroba wo kuwa Gatandatu muri Sitade nto i Remera, habereye imikino ibiri. Saa kumi n’imwe ikipe ya UTB VC yakinnye n’ikipe ya APR VC mu buryo bukomeye iyitsinda amaseti 3-1.

Iseti ya mbere yegukanywe na UTB aho yatsinze ibitego 25 kuri 20 bya APR. Iseti ya kabiri ikipe ya APR VC itozwa na Elie Mutabazi yakoresheje imbaraga nyinshi, maze yigaranzura REG VC iyitsinda ibitego 25 kuri 19.

Amaseti abiri yakurikiyeho, abakinnyi ba UTB berekanye ubunararikinnye binyuze kuri Karera Emile Dada , Sibomana Placide Madison, Mahoro Yvan na Ntagengwa Olivier berekanye ubukuru, bazitsinda mu buryo butagoranye, iseti ya gatatu bayitsinze ibitego 25-18 bya APR, iya kane na yo bayegukanye ku bitego 25-23 bya APR VC, maze intsinzi itaha muri UTB VC.

REG VC yatsinzwe umukino wa mbere muri shampiyona

Nyuma y’umukino, umutoza wa UTB VC, Nyirimana Fidele, yavuze Ko bagowe n’umukino kubera ko igihe kinini bitoza ariko badakina.

Umutoza wa APR VC, Elie Mutabazi, yavuze ko yishimiye uburyo basoje imikino ibanza kuko batsinzemo ikipe ya Gisagara VC, kandi ko ikipe igenda ikura umunsi ku munsi.

Nyuma y’uyu mukino hakurikiyeho umukino w’umunsi wahuje REG VC yakiriye Gisagara VC, imbere y’imbaga y’abantu batari bake.

Ni umukino wari ufite impamvu zirenze imwe zatumaga ukomera, abakinnyi bagera kuri babiri ba Gisagara VC bahoze muri REG VC, (Ndamukunda Flavien akaba na kapiteni wa Gisagara VC na Ndayisaba Sylvestre).

Umutoza wa Gisagara, Kwizera Pierre Marchal, yahoze ari Umukinnyi wa REG VC.

Ni umukino watangiranye ishyaka Ku mpande zombie, maze Gisagara itwara iseti ya mbere itsinze amanota 25-23 ya REG.

Iseti ya kabiri n’iya gatatu wabaye umwanya mwiza wo guhindura imikinire kuri REG VC, by’umwihariko abakinnyi barimo Ivan Ongom, Niyonkuru Gloire, Mukunzi Christopher batsinda iseti ya kabiri ku manota 26 kuri 24 ya Gisagara VC, ndetse n’iya gatatu batsinze 26 kuri 24 ya Gisagara VC.

Iseti ya kane imbaraga za Ndamukunda Flavier, Kavalo Patrick na Ndayisaba Olivier zakoze ikinyuranyo mu mukino, aho batsinze iyi seti Ku amanota 25 kuri 22 ya REG VC.

Hitabajwe iseti ya gatanu ya kamarampaka, mu buryo bworoshye Gisagara yatsinze REG VC amanota 15 ku manota 5, umukino urangira Gisagara VC itsinze REG amaseti 3 kuri 2.

Nyuma y’umukino, umutoza wa REG, Benon Mugisha, yavuze ko abakinnyi be babuze kwiremamo icyizere mu mukino.

Umutoza wa Gisagara VC Kwizera Pierre Marchal yavuze ko abakinnyi be bakuru ari bo yubakiyeho umukino.