Ni shampiyona yashyizweho akadomo kuri iki cyumweru I Kigali ahabereye imikino ya nyuma mu byiciro byombi abahungu n’abakobwa aho iyi mikino yose yabereye muri Petit Stade I Remera.

Mu cyiciro cy’abakobwa, ikipe ya St Aloys y’i Rwamagana yegukanye igikombe nyuma yo gutsinda ikipe ya St Bernadette amaseti 3-0 ku mukino wa nyuma biba igikombe cya gatatu yegukanye yikurikiranya. Ikipe ya Lycee de Nyanza niyo yegukanye umwanya wa gatatu nyuma yo gutsinda ikipe ya St Joseph y’ikabgayi.

Mu cyiciro cy’abagabo, ikipe ya Gisagara Academy yegukanye igikombe itsinze ku mukino wa nyuma ikipe ya petit seminaire virgo fidelis amaseti 3-1 yegukana igikombe ku nshuro ya kabiri yikurikiranya.

Ikipe ya Groupe Scolaire officiel de Butare (GSO Butare) niyo yegukanye umwanya wa gatatu nyuma yo gutsinda ikipe ya Nyanza TSS amaseti 3-2.

Shampiyona y’abato ya Junior League ni shampiyona isanzwe ikaba ngaruka mwaka aho itegurwa ku bufatanye b’ibigo by’amashuri ndetse na federasiyo y’umukino wa volleyball mu Rwanda.

Shampiyona yuyu mwaka yatangiye mu kwakira umwaka ushize wa 2025 aho yari igizwe n’amakipe 19 yose hamwe harimo amakipe 5 y’akobwa ndetse na 14 y’abahungu.