Guhera ku wa Gatanu tariki 25/06/2021, Ishyirahamwe ry’umukino wa Volleyball mu Rwanda (FRVB) ryateguye irushanwa rigamije kwibuka abahoze ari abakinnyi, abakunzi ndetse n’abandi bose babarizwaga mu muryango wa Volleyball bazize Jenoside yakorewe Abatutsi mu mwaka wa 1994.

Ni irushanwa ryari ryitabiriwe n’amakipe asanzwe akina mu cyiciro cya mbere mu Rwanda, ndetse hazamo n’amakipe yo muri Kenya arimo Kenya Ports Authority (mu bagabo), mu gihe mu bagore hari hajemo ikipe ya Nairobi Water.

Mu bagore, ikipe ya Rwanda Revenue ndetse na APR VC ni zo zaje guhurira ku mukino wa nyuma, umukino waje kurangira ikipe ya Rwanda Revenue ari yo yegukanye igikombe, naho umwanya wa gatatu utwarwa na Nairobi Water itsinze UTB WVC amaseti 3-2.

Mu bagabo ikipe ya Gisagara VC nyuma yo gutsinda ikipe ya UTB muri ½ mu mukino wari ugoranye ku maseti 3-2, yaje guhurira ku mukino wa nyuma na REG VC yari yasezereye APR VC.

Umukino waje kurangira ikipe ya Gisagara VC ari yo yegukanye igikombe itsinze REG amaseti 3-1, iza no guhabwa sheki ya Miliyoni 2 Frws, kimwe na Rwanda Revenue nayo yahawe ayo mafaranga angana gutyo, mu gihe iza kabiri zahawe Miliyoni 1 Frws, naho iza gatatu zihabwa ibihumbi 500 Frws.

Andi mafoto yaranze umunsi wa nyuma w’irushanwa