Ni irushanwa ryari rimaze iminsi itatu rikinwa kuva ku wa Gatanu tariki ya 3 Mutarama kugeza ku Cyumweru tariki ya 5 Mutarama 2025, ku bibuga bya King Fisher Resort-Rwesero.

Iri rushanwa ryitabiriwe n’amakipe 22 abagabo n’abagore. Usibye ibihembo bikinirwa, iri rushanwa riri ku rwego mpuzamanga kuko ryemewe n’impuzamashyirahamwe y’umukino wa volleyball ku Isi (FIVB), bityo rikaba ritanga n’amanota ku bakinnyi.

Mu bagabo ikipe ya Paul Akan na Koita Jahara, ni yo yaryegukanye itsinze ikipe ya Ntagengwa Olivier na Akumuntu Kavalo Patrick amaseti 2-0. (21-15, 21-19).

Muri iki cyiciro, ikipe ya Mandela Nzirimo na Revis Niyikiza yegukanye umwanya wa gatatu itsinze David Neeke Ukomoka muri Tanzania wakinanaga na Jean Paul Muyisenge, amaseti 2-1 (17-21, 21-17, 15-8).

Mu cyiciro cy’abagore, ikipe ya Munezero Valentine na Mukandayisenga Benitha yongeye kwegukana iri rushanwa ku nshuro ya kabiri yikurikiranya, aho kuri iyi nshuro yatsinze ikipe ya Musabyimana Penelope na Amito Sharon amaseti 2-0 (21-16, 21-11).

Muri iki cyiciro, umwanya wa gatatu wegukanywe na Yankurije Françoise wakinanaga na Nirere Aliane batsinze amaseti 2-0 ikipe ya Ndagijimana Iris na Sande Meldinah (21-16, 21-08).

Ikipe yabaye iya mbere yahawe Igikombe, imidari ndetse n’ibahasha y’ibihumbi magana atatu (300,000Frw), iya kabiri ihabwa imidari n’ibihumbi mahana abiri (200,000) naho ikipe yabaye iya gatatu yo ikaba yahawe imidari n’ibahasha y’ibihumbi ijana (100,000Frw).

Aka gace kujuje agace ka kabiri muri dutatu tugomba gukinwa muri uyu mwaka. Agace ka gatatu kakazaba mu kwezi kwa gatandatu mu Karere ka Rubavu.