Ishyirahamwe ry’imikino ngororamubiri mu Rwanda (RAF) rifatanije na MINISPOC ndetse na MIGEPROF, bateguye irushwanwa ryo gusigana ku maguru, irushanwa rizaba rigizwe n’igice cya Marathon (Kilometero 21), ndetse no gusiganwa byo kwishimisha (Run for fun).

Aya marushanwa ateganijwe kubera mu mihanda y’umujyi wa Kigali kuri iki cyumweru taliki ya 01 Ugushyingo 2015.

Uko isiganwa riteye

Abasiganwa bagamije kwishimisha no kugorora imitsi (Run for fun) barahagurukira kuri Stade Amahoro saa mbiri z’igitondo (08h00), bazenguruke Stade, bace ku ishami ryuburezi rya Kaminuza y’u Rwanda (UR-CE yahoze yitwa KIE), bagaruke kuri Stade babe bakoze intera y’ibilometero bitanu.

Nyuma y’iminota itanu bahagurutse, Ku i Saa mbili n’iminota itanu, abasiganwa igice cya Marathon (Half Marathon), nabo bazahaguruka kuri Stade Amahoro, bace ku Gishushu, banyure kuri rondpoint ya Kacyiru, bakomeze bace kuri Police, bamanuke ku Kinamba, banyure mu muhanda w’imodoka ziremereye (Poids Lourds), bace RWANDEX na SONATUBES, basubire kuri Stade Amahoro, babe bakoze intera y’ibilormetero 21.

Nk’uko bitangazwa n’abateguye aya marushanwa,iri rushanwa riri mu rwego rwo gufasha abakinnyi bakina imbere mu gihugu kuzamura ibihe bakoresha muri aya marushanwa,ndetse no kongera abakinnyi babigize umwuga mu Rwanda.

Batandatu ba mbere bazitwara neza muri iri siganwa bazahembwa na MIGEPROF kuko ariyo muterankunga mukuru, uwa mbere mu bahungu no mu bakobwa akazahembwa amafaranga y’u Rwanda 300,000.

Sammy IMANISHIMWE