Ni irushanwa ryabaga ku nshuro ya mbere mu bakuze, ryitabirwa n’amakipe 12 yo mu Rwanda no muri Kenya. Aya makipe yose yahizwe n’ikipe ya The Great Warriors Karate Academy yo mu Mujyi wa Kigali kuko ariyo yegukanye umwanya wa mbere nyuma yo gutwara imidali irindwi muri rusange irimo itanu ya zahabu ndetse n’ibiri ya silver.

The Great Warriors Karate Academy yakurikiwe ku mwanya wa kabiri na The Champions Sports Academy yatwaye imidali 11 ariko irimo ibiri ya zahabu gusa, silver ebyeri ndetse n’itanu ya bronze mu gihe ku mwanya wa gatatu haje APR Karate-Do yatahanye imidali ibiri ya zahabu muri 12 yatwaye naho Fly Eagles Karate Club yegukana umwanya wa kane n’imidali ibiri ya zahabu gusa.

Umuyobozi wa Zanshin Karate Academy itegura iri rushanwa akaba n’umusifuzi Mpuzamahanga, Sensei Mwizerwa Dieudonne yavuze ko ku nshuro ya mbere bariteguye ryagenze neza kandi ko ryaberetse urwego rwiza rw’abakinnyi.

Ati "Irushanwa ryatweretse urwego ruhambaye rw’abakinnyi kuko hagaragaye n’izindi mpano zitari zizwi kuko ryari mpuzamahanga bityo abakinnyi baje babizi ko ari irushanwa rikomeye."

Ni irushanwa ryagaragayemo ikoranabuhanga ryunganira abasifuzi twafata nka VAR muri ruhago aho abaryitabiriye bavuga byakemuye itangwa ry’amanota ku bakinnyi.

Mu mpera z’iki cyumweru tariki 24 na 25 Kanama 2024 n’ubundi hateganyijwe irushanwa nk’iri ariko noneho mu bakiri bato bafite hagati y’imyaka ine (4) na cumi n’itanu (15), naryo rizabera mu karere ka Huye.