Ayo marushannwa agiye kuba ku nshuro ya Gatatu (3rd African Youth Games), ateganijwe guhera ku itariki ya 18 kugeza ku ya 28 Nyakanga 2018.

Azitabirwa n’abakinnyi batatu barimo Victor Shyaka Kaberuka uzarushanwa mu myiyereko izwi nka Kata, Halifa Niyitanga uzarushannwa mu bari munsi y’ibiro 61 arwana (Kumite), na Jovia Umunezero na we uzaba arushanwa mu bari munsi y’ibiro 59 arwana.

Abo bakinnyi bamaze ukwezi kurenga mu mwiherero bitegura ayo marushanwa,aho bari kumwe na bakuru babo bazafatanya mu marushanwa Nyafurika ya Karate, ateganijwe mu mpera z’ukwezi kwa Kanama 2018.

Nkoranyabahizi avuga ko ashingiye ku buryo abo bakinnyi bitwara mu myiteguro, adashidikanya ko bazatahana imidari muri ayo marushanwa.

Ati” Aba bana ni abahanga, icyo turi kubafasha ni ukwitegura neza cyane cyane mu mutwe, kugira ngo batazagira ubwoba,kuko ari ubwa mbere bitabiriye amarushanwa yo ku rwego mpuzamahanga nk’aya.”

“Intego tuzajyana ni ukwegukana imidari kandi tukanatsindira amahirwe yo kuzitabira amarushanwa yo ku rwego rwa Olympic azabera i Buenos Aires mu gihugu cya Argentine. “

Ni ku nshuro ya kabiri ikipe y’igihugu ya Karate y’abatarengeje imyaka 18, yitabiriye ayo marushanwa, ikaba izajyana n’ikipe y’abakina Volley Ball yo ku musenyi, ndetse n’abakina imikino ngororamubiri.