Kimwe n’andi makipe yitabiriye iri rushanwa, ikipe ihagarariye u Rwanda igizwe n’abakinnyi 14 yiyeretse imbaga yari yuzuye sitade olempike y’i London.

Abakinnyi b’u Rwanda by’umwihariko bari biteye imyitero nyarwanda batamba nk’abagiye gusaba umugeni aho bari barongojwe imbere na Muvunyi Hermas, umwe mu bakinnyi Abanyarwanda benshi bahanze amaso muri iyi mikino.

Muvunyi Hermas, kapiteni w’iyi kipe yatangaje ko ikipe yiteguye muri rusange. Mu minsi ishize, Muvunyi usiganywa muri metero 400 na 800 yatangaje kandi ko by’umwihariko yiteguye gukora ibishoboka byose ngo azane umudari muri aya marushanwa.

Kuri uyu wa kane tariki 30/08/2012 ikipe y’u Rwanda mu mukino wa Sitting Volleyball iracakirana n’ikipe y’igihugu cya Iran.

Mu mikino ya Olempike iherutse kubera mu gihugu cy’u Bwongereza u Rwanda rwari ruhagarariwe n’abakinnyi barindwi gusa bose nta n’umwe wabashije kuzana umudari.

Iyi mikino ya Paralempike yaraye itangiye izasozwa tariki 09/09/2012 ikaba yitabiriwe n’abakinnyi basaga 4200.

Jacques Furaha