Ni imikino ya nyuma yakinwe ku wa Gatandatu no ku Cyumweru mu nyubako y’imikino y’Abafite ubumuga iherereye i Remera.Mu bugabo Gisagara SVB ku wa Gatandatu yageze ku mukino wa nyuma wakinwe kuri iki Cyumweru,isezereye Rwamagana nyuma yo kuyitsinda amaseti 3-0 aho yahuriye na Musanze SVB yo yahageze muri 1/2 isezerereye Gasabo SVB iyitsinze amaseti 3-0

Muri uyu mukino wa nyuma utari woroshye,ikipe ya Gisagara yari imaze kwegukana ibikombe bitandatu yikurikiranya ntabwo yahiriwe ku iseti ya mbere kuko Musanze yayegukanye itsinze amanota 25-20. Iseti ya kabiri yagoranye ku mpande zombi,Gisagara iyobora igihe kirekire ariko Musazne iyigarukana iturutse inyuma iyegukana ku manota 26-24 amakipe yombi anganya 1-1. Gisagara SVB yegukanye iseti ya gatatu mu buryo buyoroheye itsinze amanota 25-12 mu gihe iya nyuma yari iya kane y’umukino yo yayegukanye bitoroshye itsinze amanota 25-22 inegukana shampiyona 2024-2025 ya mbere mu mateka yayo.

Mu bagore ikipe ya Bugesera Women Sitting Volleyball niyo yari yageze ku mukino wa nyuma,nyuma yo gusezerera Nyarugenge Sitting Volleyball iyitsinze amaseti 3-0 muri 1/2 cyakinwe ku wa Gatandatu mu gihe Musanze Women Sitting Volleyball yo yahageze isezereye Rulindo W SVB muri 1/2 iyitsinze nayo amaseti 3-0. Bugesera yari ibitsinze igikombe cya 2023-2024 n’ubundi iyo yahabwaga amahirwe ndetse kuri iki Cyumweru bigenda uko byatekerezwaga yegukana shampiyona 2024-2025 nyuma yo gutsinda Musanze Women Sitting Volleyball ku mukino wa nyuma amaseti 3-1.

Ni umukino mu iseti ya mbere Musanze W SVB yatunguranye iyitwara itsinze Bugesera W SVB amanota 25-23 gusa mu iseti ya kabiri Bugesera W SVB ikora ibyo imenyereweho iyitwara itsinze amanota 25-12.Iseti ya gatatu nayo yakurikiyeho Bugesera W Sitting Volleyball yayitwaye itsinze amanota 25-14.Byari bitanze ikizere ko ishobora gutwara iya gatatu yayo yari iya kane mu mukino byoroshye ariko biragorana kuko yayegukanye itsinze amanota 26-24 ya Musanze W SVB,umukino urangira itsinze amaseti 3-1 itwara igikombe cya shampiyona cya karindwi itwaye yikurikiranya dore bitandatu biheruka byose ariyo ibibitse.

Mu guhatanira umwanya wa gatatu,mu bagabo wegukanywe n’ikipe ya Gasabo SVB yatsinze Rwamagana SVB amaseti 2-0 mu gihe mu bagore ikipe ya Nyarugenge W SVB ariyo yawegukanye itsinze Rulindo W SVB amaseti 2-0.Amakipe ya Ruhango na UR Huye yazamutse mu cyiciro cya mbere avuye mu cyiciro cya kabiri aho ku mukino wa nyuma UR Huye yatsinze amaseti 3-0 mu gihe ikipe y’Akarere ka Rubavu na UR Rukara zo zamanutse mu cyikiro cya kabiri.

VIDEO - Ibyishimo ni byinshi ku Ikipe ya Bugesera Women Sitting Volleyball yegukanye igikombe cya shampiyona 2024-2025, nyuma yo gutsinda Musanze Women Sitting Volleyball ku mukino wa nyuma amaseti 3-1. pic.twitter.com/4LPFD0QXAK

— Kigali Today (@kigalitoday) March 23, 2025