Ni isiganwa rizatangira ku wa Gatandatu tariki 29 kugera ku cyumweru tariki 30/06/2019, aho rizaba rigizwe n’imodoka 7 zo mu Rwanda, harimo abakinnyi bazwi nka Gakwaya Claude wigeze no kuryegukana, ndetse n’imodoka ebyiri za Akagera Business Group.

Hazaba harimo kandi imodoka eshanu zizaturuka i Burundi, harimo iya Din Imitiaz wegukanye Shampiyona y’u Rwanda umwaka ushize.

Hazaza nanone imodoka enye zizava Uganda, aha hazaba harimo imodoka ya Kabega Musa wegukanye iri siganwa inshuro ebyiri (2017 na 2018).

Iri siganwa rizatangirira mu mujyi wa Huye Saa Sita z’amanywa, aho bazakoresha inzira ya Rango-Kibirizi-Mugusa-Gisagara- Rwasave, basoreze Kabutare aho bazarukora inshuro ebyiri.

Huye Rally, ihorana umwihariko w’isiganwa rya nijoro (Night stage)

Nk’uko bisanzwe, ku wa Gatandatu guhera Saa moya z’ijoro hazaba isiganwa rya nijoro, aho abasiganwa bazakoresha inzira ya Rango-Kibirizi-Gisagara-Rwasave-Mbazi, bakazasoza ahagana Saa tatu z’ijoro.

Ku Cyumweru isiganwa rizakomereza mu mihanda, aho bazasiganwa mu muhanda wa Save-Rwanza-Shyanda, bakazatangira i Saa yine kugera Saa munani.

Ku Cyumweru abanye-Huye bwa mbere bazabona isiganwa ry’utumodoka duto (Karting)

Ni isiganwa rimaze kubera inshuro ebyiri mu mujyi wa Kigali, aho abanye-Huye nabo bazarikurikirana Ku wa gatandatu kuva Saa kumi n’ebyiri z’umugoraba kugeza saa yine z’ijoro, no ku Cyumweru kuva Saa munani kugeza Saa kumi n’ebyiri kuri Stade Huye .