Ibi aya makipe yabigezeho nyuma yo guhurira ku mukino wa nyuma w’imikino y’icyiciro cya kabiri yaberaga mu Rwanda hagati tariki 21-27 Kanama 2024 yitabiriwe n’amakipe arindwi ariyo Kenya, Mozambique, Malawi, Botswana, Lesotho, Eswatini na Sierra Leone, imikino ikaba yaraberaga kuri stade ya Gahanga, Malawi yegukana umwanya wa mbere itsinze Kenya ku mukino wa nyuma.

Ni umukino wari utegerejwe na benshi maze Kenya yahabwaga amahirwe itangira ishyiramo amanota 109 muri overs 20, nubwo byari bimeze gutya ariko, Malawi itarahabwaga amahirwe na benshi bitewe nuko yatangiye umukino, yatunguranye yigaranzura Kenya iyisezerera ku kinyuranyo cya wickets ebyiri (2) mu gihe Malawi yashyizemo amanota 110 ariko Kenya yasohoye abakinnyi 8 ba Malawi.

Malawi Na Kenya zahise zizamuka mu cyiciro cya mbere aho zasanze amakipe arimo u Rwanda, Zimbabwe, Uganda, Tanzania, Nigeria na Namibia nabyo bizahurira i Kigali hagati ya tariki 20-30 Nzeri 2024 zishakamo ikipe imwe igomba kujya mu gikombe cy’Isi.