Ni umukino byari biteganyijwe ko utangira ku isaha ya saa moya zuzuye ariko zirengaho iminota 35 kuko nubwo imvura yari yatangiye kugwa na mbere yuko isaha igera, amatara ya Kigali Pelé Stadium yabanje gutinda kwaka kubera moteri y’iyi stade yari yabanje kugorana dore ko yatse saa kumi nebyiri n’iminota 45 (18h45), amakipe abona gutangira kwishyushya.

Iyi moteri mu mpera z’umukino wahuje Rayon Sports na Bugesera FC wabanje gukinwa, aho iteretse hazamutse umwotsi wibajijweho aho abenshi bavugaga ko kwanga kwaka byaba bifitanye isano. Nyuma yo kwaka kw’amatara, saa moya n’iminota 35 (19h35), nibwo umusifuzi yatangije umukino mu mvura itari nyinshi.

Uko umukino wegeraga imbere, imvura yagiye yiyongera ari nako ikibuga cyuzura amazi, nyuma y’iminota 15 umusifuzi yaje gufata umwanzuro wo guhagarika umukino amakipe asubizwa mu rwambariro.

Nyuma y’indi minota 15 abasifuzi bagarukanye n’aba kapiteni b’amakipe yombi bareba niba umupira wagenda ariko kuko amazi yari menshi mu kibuga, bafashe umwanzuro wo gusubika umukino.

Itegeko riteganya ko umukino usubukurwa mu masaha 24 akurikira. Ntabwo ari uyu mukino wonyine umaze gusubikwa kubera imvura muri uyu mwaka w’imikino, dore ko umukino wahuje Police FC na Vision FC nawo byagenze gutyo uhagarikwa igice cya mbere kirangiye maze usubukurwa ku munsi ukurikira hakinwa igice cya kabiri.