Rutahizamu Djibril Ouatara yasinyiye APR FC

Ku wa Kabiri tariki 14 Mutarama 2025, ikipe ya APR FC yasinyishije rutahizamu ukomoka muri Burukina Faso, Cheick Djibril Ouattara, uheruka kwirukanwa na JS Kabylie yo muri Algeria.

Cheick Djibril Ouattara wasinyiye APR FC
Cheick Djibril Ouattara wasinyiye APR FC

Ni amakuru yamenyekanye ku mugoroba wo ku wa kabiri, atangajwe n’umunyamakuru Kalisa Bruno Taifa, ko Djibril Ouatara w’imyaka 25 y’amavuko yasinyiye APR FC imyaka ibiri ayitahira izamu.

Rutahizamu Djibril Ouatara yatangiriye gukina ruhago mu ikipe ya Vitesse FC 2016-2017 iwabo, mbere yo kuyivamo akajya muri ASF Bobo Douglas na yo y’iwabo mu 2017, aho ku myaka 19 yayifashije gutwara shampiyona 2017-2018 ari na we uyoboye abatsinze ibitego byinshi, dore ko yari afite 15.

Nyuma yo kwitwara neza muri shampiyona iwabo, yahise abengukwa na RS Berkane yo muri Maroc iramugura ayibamo kugeza mu mpeshyi ya 2024 ubwo yayivagamo, atangiye kubura umwanya wo gukina.

Cheick Djibril Ouattara yagiranye ibihe byiza na RS Berkane, kuko 2019-2020 batwaranye igikombe cya CAF Confederation Cup mu gihe batsindiwe ku mukino wa nyuma wacyo kabiri, 2018-2019 na 2023-2024, mu gihe banatwara ibikombe bibiri bya Throne Cup imbere muri Maroc 2020-2021 na 2021-2022.

Cheick Djibril Ouattara yatwaranye na RS Berkane igikombe cya CAF Confederation Cup
Cheick Djibril Ouattara yatwaranye na RS Berkane igikombe cya CAF Confederation Cup

Nyuma yo kuva muri RS Berkane, mu mpeshyi ya 2024 yasinyiye JS Kabylie yo muri Algeria amasezerano y’imyaka itatu, ariko yirukanwa tariki ya 6 Mutarama 2025 akinnyemo igice cy’umwaka, aho yari amaze gukina imikino umunani ya shampiyona atsinze igitego kimwe, mu gihe muri rusange kuva 2019-2020 akina muri RS Berkane kugeza ubu asezererwa muri Algeria, yari akinnye imikino 86 ya za shampiyona, habariwemo n’aho yagiye atizwa akiri muri Maroc mu bihe bitandukanye atsindamo ibitego 13 byonyine mu myaka itanu, nk’uko bigarazwa n’urubuga https://www.flashscore.com/r/?t=4&id=KxvVXFts.

Akinira ikipe y’igihugu ya Brukina Faso:

Cheick Djibril Ouattara w’imyaka 25 y’amavuko akinira ikipe y’igihugu ya Brukina Faso kuva tariki 24 Kanama 2018, aho amaze gukina imikino 14 yatsinzemo ibitego bibiri.

Uyu musore ariko mbere yo kugera mu ikipe y’igihugu nkuru, yananyuze mu batarengeje imyaka 20 aho mu 2019 mu mikino ya Afurika, yanafashije igihugu cye gutwara umudali wa zahabu ari we utsinze ibitego byinshi.

Cheick Djibril Ouattara ageze muri APR FC ari umukinnyi wa gatatu mushya, iyi kipe iguze muri uku kwezi kwa Mutarama 2025, nyuma yo gusinyisha Abagande babiri bakina basatira banyuze ku ruhande, Hakim Kiwanuka na Denis Omedi.

National Football League

kigalitoday android app mobile

Ibitekerezo   ( 2 )

Babahaye umwanya bakwigaragaza ariko tuzabireba mumikino 2 yambere gusa turacyafite imungenge mugusatira izamu?

Theogene yanditse ku itariki ya: 26-01-2025  →  Musubize

Murakoze!
Gusa ndabona uyu nta statistics zikaze afite ninkababandi nubundi baza kwirira Kuma dollars ya APR gusa

ELoi yanditse ku itariki ya: 16-01-2025  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka