Uyu mukino watangiye Saa Kumi n’Ebyiri z’umugoroba watangiye utuje, ariko APR FC igaragaza imbaraga mu minota ya mbere nubwo itabashije kubona igitego. Ku munota wa 15, Djibril Ouattara yafunguye amazamu ku gitego cyiza yatsinze ari hanze gato y’urubuga rw’amahina agatera ishoti rikomeye mu izamu rya Twagirumukiza Clement.

‎Ikipe y’Ingabo z’Igihugu yakomeje kwiharira umukino, ihererekanya neza umupira ari nako inabona uburyo bwinshi, ariko ikomeza guhusha ibitego byabazwe, by’umwihariko ku ruhande rwa Ouattara na William Togui ndetse na Dauda Youssif wahushije uburyo bworoshye imbere y’izamu ku munota wa 38.

Amagaju FC na yo yagerageje gusatira izamu rya APR FC binyuze kuri Rwema Amza na Habineza Alphonse, ariko ntibyatanga umusaruro. ‎Mu gice cya kabiri, APR FC yakomeje kuyobora umukino no kurema uburyo bwinshi, ariko umusaruro w’ibitego uba nkene.

Amagaju na yo yabonye uburyo bukomeye, cyane cyane ku munota wa 75 ubwo Iradukunda Desire yahushaga igitego cyari cyabazwe nyuma y’umupira mwiza yarahawe na Ndayishimiye Edouard.
‎

‎Nyuma yo gusoza uyu mukino APR FC itsinze igitego 1-0, ikegukana amanota atatu yayifashije gufata umwanya wa mbere by’agateganyo n’amanota 49, mu gihe Amagaju FC yakomeje kuguma mu murongo utukura ku mwanya wa 17 n’amanota 21.