‎Uyu mukino watangiye ku isaha ya Saa Kumi n’Ebyiri, watangiye utuje, ubona amakipe yombi ari kwigana APR FC itangira ishaka igitego maze ku munota wa gatanu, Memel Dao atera ishoti rikomeye ariko umunyezamu Nsabimana Jean de Dieu arawufata. Mu minota 20 ya mbere y’umukino, APR FC yari yihariye umupira ariko itarabasha kurema uburyo bufatika.
‎

‎Umukino ugeze ku munota wa 28 waje guhagarara bitewe n’uko amatara acanira Stade yari yazimye, iki kibazo cy’amatara cyamaze iminota 20 yose, umukino ubona gukomeza. Umukino ujya kugana ku musozo, Cheikh Djibril Ouattara yahinduye umupira mwiza ariko Denis Omedi ashyizeho umutwe ujya hejuru y’izamu. Amakipe yombi ajya kuruhuka ari ubusa ku busa.

‎Igice cya kabiri kigitangira, Dauda yagerageje ishoti rikomeye ariko umupira bawushyira muri koruneri itagize icyo itanga. APR FC yabonye penaliti ku munota wa 51 ku ikosa ryakorewe Cheikh
‎ Djibril Ouattara maze ayiteye ayotera hejuru y’izamu.

Ku munota wa 70 Ronald Ssekiganda yatsinze igitego cya mbere, ku mupira wavuye kuri koruneri yatewe na Raouf Memel Dao, Musanze FC ikomeza kugorwa n’umukino.
‎

‎Abatoza ku mande zombi bakoze impinduka zitandukanye, Taleb wa APR yakoze impinduka, Ruboneka Bosco asimbura Seidu Yussif Dauda, Hakim Kiwanuka asimbura Denis Omedi, Mamadou Sy asimbura Cheikh Djibril Ouattara mu gihe Mugisha Gilbert yasimbuye Memel Dao.

‎Aba bakinnyi bafashije ikipe y’ingabo z’igihugu kurema uburyo butandukanye ariko kububyaza umusaruro bibanza kugorana aho byasabye umunota wa nyuma maze William Togui Mel atsinda igitego ku ishoti rikomeye nyuma y’umupira Kiwanuka yahinduye maze Mugisha Gilbert akozaho umutwe, Togui ahita ashyira mu rushundura. Umukino urangira ari 2-0, ikipe ihita ifata umwanya wa mbere n’amanota 46.