Kuri uyu wa Kane tariki 25/03/2021, ku cyicaro cy’uruganda rukora ibinyobwa rwa Skol Brewery Ltd habaye umuhango wo kuvugurura amasezerano hagati ya Rayon Sports na Skol, amasezerano yari amaze imyaka itandatu.

Aya masezerano yasinywe akubiye mu bice bitatu birimo amafaranga, ibikoresho by’ikipe n’ibikorwa remezo iyi kipe ikoresha birimo nk’ikibuga n’amacumbi, bikaba byose bifite agaciro k’amafaranga arenga Miliyoni 200 Frws azajya atangwa buri mwaka.

Izi mpande zombi amasezerano mashya bafitanye yasinywe mu mwaka wa 2017, akaba yagombaga kurangira muri 2022, ariko akaba yaravugaga ko mu myaka ibiri ya nyuma hazabaho ibiganiro bishya byo kuvugurura amasezerano.

Amasezerano asanzwe ikipe ya Rayon Sports yahabwaga miliyoni 66 Frws ku mwaka, ubu amasezerano mashya agomba kumara imyaka itatu kugeza mu mwaka w’imikino wa 2022/2023, Rayon Sports ikazajya ihabwa amafaranga arenga Miliyoni 200 Frws nk’uko byatangajwe.