Ibi bikubiye mu byemezo byafashwe mu nama ya Komisiyo ishinzwe amarushanwa muri FERWAFA yateranye kuri uyu wa Mbere , aho yifashishije ingingo ya 21 y’amategeko agenga amarushanwa ivuga ikipe irebwa n’imyitwarire y’abafana bayo , yanzuye ko ikipe ya Rayon Sports izakina idafite abafana ku kibuga mu mikino ibiri ya shampiyona isigaye.Muri iyi mikino harimo n’uwa Bugesera FC wabaye intandaro uzasubukurwa ku wa Gatatu w’iki Cyumweru ndetse n’indi ibiri izaba isigaranye ngo shampiyona irangire.

Iyi komisiyo kandi yavuze ko Stade ya Bugesera yujuje ibisabwa ngo yakire amarushanwa ya FERWAFA kuko yakorewe ubugenzuzi mbere y’uko umwaka w’imikino 2024-2025 utangira ndetse ikabihererwa uburenganzira, mu gihe kandi abagaragaye ku giti cyabo nk’abagize uruhare mu byabereye mu karere ka Bugesera bazahanwa hakurikijwe amategeko ya FERWAFA.

Rayon Sports iri kurwanira igikombe cya shampiyona izakira Vision FC ku mukino w’umunsi wa 29 uzakinwa tariki 24 Gicurasi 2025 mu gihe izasoreza kuri Gorilla FC aho niyo yatwara igikombe, nta mufana uzaba yemerewe kwinjira mu kibuga.