Rayon Sport ku mwanya wa 3 nyuma yo kunganya na Musanze I Nyamirambo

27-10-2014 - 16:24' | Ibitekerezo ( 1 )

Umunsi wa gatatu wa Shampiyona y’u Rwanda wasize Rayon Sport FC yari ku mwanya wa mbere by’agateganyo igeze ku mwanya wa 3. Ni nyuma yo kunganya n’ikipe ya Musanze FC 1-1 kuri Stade Regional i Nyamirambo.

Kuri ubu nyuma y’umunsi wa 3 wa shampiyona y’u Rwanda, ikipe ya APR FC iyoboye urutonde rwa Shampiyona nyuma yo gutsinda imikino yayo yose imaze gukina n’amanota 9/9.

Ni nyuma y’aho ikipe ya APR ibifashijwemo na Mubumbyi Barnabé ndetse na Iranzi Jean Claude itsinze Etincelles y’i Rubavu 2-0 kuri Sitade Regional I Nyamirambo.

Ikipe ya Police na Rayon Sport zinganya amanota n’ibitego ziza ku mwanya wa 2 aho buri yose ifite amanota 7 ikaba izigamye ibitego 6, ku rutonde Rayon Sport ikaba iya gatatu hakurikijwe inyuguti itangira amazina yazo.

Kuri uyu wa 28, ikipe ya APR FC izahura na Marines kuri Stade Umuganda I Gisenyi,mu gihe ikipe ya Rayon Sport nayo izajya I Gisenyi ku munsi ukurikiyeho igacakirana n’ikipe ya Etincelles.Police FC yo ikazakina na AS Kigali ku Kicukiro,kuri uyu wa kabiri.

Safari Viateur