Ibi byabaye nyuma y’imikino yo kwishyura ya 1/4 yabaye muri iri joro muri Espagne aho Atletico Madrid yari yakiriye FC Barcelona yayihatsindiye 2-1 mu gihe Liverpool mu Bwongereza yari yakiriye PSG yayitsindiye mu rugo 2-0.

Ikipe ya FC Barcelona yari yatsindiwe mu rugo ibitego 2-0 mu rugo mu mukino ubanza yatangiye ku munota wa kane itsinda igitego cya mbere cyatsinzwe na Lamine Yamal inabona icya kabiri ku munota wa 24 cyatsinzwe na Ferran Torres. Kugeza ku munota wa 30, amakipe yombi yashoboraga kwitabaza iminota 30 y’inyongera byakwanga bagatera penaliti ariko iyi mibare yishwe n’Umunya-Nigeria Ademola Lookman watsindiye Atletico Madrid igitego cya mbere ku munota wa 31.

Igice cya mbere cyarangiye FC Barcelona ifite ibitego 2-1 ariko ku giteranyo Atletico Madrid ifite ibitego 3-2 maze mu gice cya kabiri ku munota wa 57 FC Barcelona ibona igitego cyatsinzwe na Ferran Torres nanone ariko cyangwa kubera ko habayemo kurarira. FC Barcelona yakomeje gushaka igitego cyatuma binjira mu minota wa 30 y’inyongera banganya 3-3 ariko iminota 90 isanzwe irangira igifite 2-1 ndetse n’inyongera umunani ishira bimeze gutyo, isezererwa ku giteranyo cy’ibitego 3-2 mu mikino ibiri.

Mu wundi mukino wabereye mu Bwongereza, Liverpool yahatsindiwe na PSG ibitego 2-0 isezererwa itsinzwe ibitego 4-0 mu mikino ibiri. Ni ibitego byatsinzwe na Ousmane Dembele ku munota wa 72 ku ishoti yatereye hanze y’urubuga rw’amahina umunyezamu Giorgi Mamardashvili akananirwa kurikuramo ndetse n’icyo yatsinze ku munota wa wa mbere w’inyongera muri itandatu yongereweho.

Ibi bitego byaje bikurikira uburyo bwinshi bwahushijwe na Liverpool ku bakinnyi barimo Rio Ngumoha, Virgil Van Dijk aho harimo akazi kagiye gakorwa n’umunyezamu Matvéi Safónov wa PSG ndetse na penaliti Liverpool yari ibonye ku munota wa 66 ariko VAR ivuga ko nta kosa ryakorewe Alexis Mac Allister.

PSG yasezereye Liverpool, muri 1/2 izahura n’ikipe izakomeza hagati ya Bayern Munich irakira Real Madrid kuri uyu wa Gatatu Saa Tatu z’ijoro aho umukino ubanza iyi kipe yo mu Budage yatsinze ibitego 2-1 mu gihe Atletico Madrid yasezereye FC Barcelona izahura n’ikipe ikomeza hagati ya Arsenal yakira Sporting CP aho mu mukino ubanza, Arsenal yari yatsinze igitego 1-0.

Gusezererwa kwa Liverpool bivuze ko iyi kipe uyu mwaka nta gikombe na kimwe izatwarwa kuko iri ku mwanya wa gatanu muri shampiyona y’u Bwongereza mu gihe yasezerewe mu bikombe bya FA Cup na Carabao Cup.

Uyu mukino kandi wari uwa nyuma wa UEFA Champions League Mohamed Salah na Andy Robertson bakiniye Liverpool aho byumwihariko urugendo rwabo muri iri rushanwa muri iyi kipe barusoreje mu rugo,dore ko mu mpeshyi y’uyu mwaka bazayivamo aho bombi bayihesheje iki gikombe mu 2019.