Uyu mukino urasifurwa n’inararibonye mu busifuzi Kagabo Issa, byitezwe ko uzaba irimo ishyaka ryinshi bitewe n’imbaraga Isonga FC irimo gukinisha muri iyi minsi ndetse n’uburyo irimo kugora amakipe asanzwe akomeye.

Isonga FC igizwe n’abakinnyi batarengeje imyaka 20, ku wa gatandatu yihereranye Rayon Sport iyitsinda ibitego 3 kuri 1. Ibi biri mu bituma umukino uzayihuza na Police FC ukomera kuko Isonga izaba ifite akanyamuneza, dore ko yanabashije guhangara amakipe nka Kiyovu Sport na Etincelles, zikagabana amanota.

Ubuyobozi bwa Police FC bufite intego yo gutwara igikombe cya shampiyona. Gutakaza amanota imbere y’Isonga byaba ari uguha amahirwe amakipe ari imbere yayo APR na Mukura yo gukomeza kuyobora shampiyona.

Nubwo ayo makipe ashaka intsinzi, yombi afite abakinnyi asanzwe agenderaho batazagaragara muri uwo mukino kubera amakarita abiri y’umuhondo bahawe mu mikino yashize.

Isonga FC izakina idafite Kapiteni Bayisenge Emery, Hakizimana Francois na Ntaribi Steven, mu gihe Police FC izakina idafite kapiteni wayo Meddie Kagere kuko nawe afite amakarita abiri y’umuhondo.

Meddie Kagere ubu niwe ufite ibitego byinshi muri shampiyona kugeza ubu. Afite ibitego 8.

Police FC nitsinda uwo mukino izahita ifata umwanya wa mbere, mu gihe isonga FC iramutse itsinze uwo mukino yahita ijya ku mwanya wa 7.

Theoneste Nisingizwe