Uyu mukino watangiye ku isaha ya Saa Cyenda z’amanywa, watangiranye imbaraga ku makipe yombi, Gikundiro inyuzamo ikagerageza uburyo imbere y’izamu rya Police FC, ndetse nayo ikanyuzamo igasatira. Rayon Sports yashoboraga gufungura amazamu hakiri kare ariko Fall Ngagne, Sindi Paul Jesus na Aziz Bassane bagorwa no kubyaza umusaruro uburyo babonye imbere y’izamu rya Police FC yagaragaje guhuzaguruka mu kugarira.
‎

‎Ku ruhande rw’ikipe ya Polisi y’Igihugu, Ani Elijah, Kwitonda Alain Bacca na Gakwaya Leonard na bo bahushije uburyo bwiza imbere y’izamu rya Kwizera Olivier, binaviramo imvune Bayisenga Emery wahise asimburwa na Nshimiyimana Emmanuel.Nubwo yatabaye Rayon Sports kenshi, Kwizera Olivier yakoze ikosa ryashoboraga kuvamo igitego ku mupira yihereye Ekeson Ekorie, ku bw’amahirwe abakinnyi bagenzi be barahagoboka, maze igice cya mbere kirangira ari 0-0.
‎

‎Mu gice cya kabiri abatoza bombi bagerageje gukora impinduka zitandukanye mu bakinnyi, ariko igitego gikomeza kubura. Mugisha Didier wa Rayon Sports wari winjiye mu kibuga asimbuye Sindi Paul Jesus nyuma y’iminota micye yagize ikibazo nawe avamo asimburwa na Ndikumana Asman, wagerageje uburyo bwinshi ariko umunyezamu Rukundo Onesime ababera ibamba, umukino urangira amakipe anganyije 0-0. Rayon Sports izakira Police FC mu cyumweru gitaha mu mukino wo kwishyura uzaba ku wa Kane, tariki ya 19 Werurwe 2026, kuri Kigali Pele Stadium.