Nyuma yo kugurwa miliyoni 67 yasubiye mu ikipe yahozemo ku buntu

2-09-2013 - 14:44' | Ibitekerezo ( 2 )

Umunya-Brasil Kaka Ricardo Izecson Santos Leite, wakiniraga Real Madrid yerekeje mu ikipe yahozemo ya AC Milan ku buntu nubwo yari yaraguzwe miliyoni 67€ ubwo yerekezagamuri Real Madrid muri 2009.

Kaka agiye mu ikipe ya Milac AC ku buntu, aho azakinira iyi kipe imyaka ibiri ahembwa ama Euro miliyoni 4 ku mwaka, mu gihe yahembwaga Miliyoni 8 z’ama Euro muri Real Madrid.

Kujya mu ikipe ya Milan AC kwa Kaka, akaba ari nko gusubira mu ikipe yagiriyemo ibihe byiza nk’uko bamwe babivuga. Benshi bakaba banategereje kureba niba yakongera kuyigiriramo ibihe byiza nka mbere.
Kaka, akaba agiye gukinana n’abakinnyi bakomeye nka K. Boateng, Mario Balotteli na Stephan El Shaarawy bo muri AC Milan.

Nyuma yo kwambara umwenda wa Real Madrid, Kaka agiye kongera kuboneka mu mwenda wa Milan AC yo mu Butaliyani yari yaravuyemo.

Ricardo Kaka ni umukinnyi witwaye neza cyane cyane mu mwaka wa 2007 ubwo yegukanaga Ballon d’or, banatwarana Champions League n’ikipe ya Milan AC , igikombe kiruta ibindi cy’ama clubs ku isi muri 2007, igikombe kiruta ibindi mu Butaliyani muri uwo mwaka wa 2007, ndetse n’igikombe kiruta ibindi ku mugabane w’I Burayi “Super-coupe d’Europe “.
Uyu mukinnyi yari yaranatwaranye n’iyi kipe ya AC Milan igikombe cya Shampiyona mu mwaka wa 2003-2004.

Kaka kandi yatwaranye igikombe cy’isi n’ikipe ya Brasil le Seleçao, mu mwaka wa 2002. Kuva 2009 kugeza ubu, umukinnyi Kaka yakiniraga ikipe ya Real Madrid.

Uyu mukinnyi w’imyaka 31 yakinnye imikino 470, muri iyo mikino yatsinzemo ibitego 155, atanga imipira ihita ivamo ibitego”passes desicives” inshuro 70. Yatoranyijwe mu ikipe y’igihugu ya Brasil inshuro 87.

Safari Viateur