Mukura Victor Sport ku mwanya wa nyuma muri shampiyona

5-11-2014 - 07:14' | Ibitekerezo ( )

Ikipe ya Mukura Victor Sport yo mu karere ka Huye kuri uyu wa 04/11/2014 yaraye ku mwanya wa nyuma n’amanota abiri nyuma yo gutsindwa na Marines igitego 1- 0.

Kuva shampiyona yatangira, Mukura Victor Sport nta mukino n’umwe iratsinda. Imaze gutsindwa imikino ine, ikaba yaranganyije imikino ibiri.

Ku ikubitiro Mukura yatsinzwe igitego 1-0 na Espoir, bwa kabiri itsindwa na Gicumbi 1-0, ubwa gatatu itsindwa na Kiyovu Sport 3-1, ku nshuro ya kane inganya na Sunrise 1-1, ku munsi wa 5 inganya na AS Kigali 0-0 naho ku munsi wa 6 ikaba yatsinzwe na Marines 1-0.

Bamwe mu bakinnyi ba Mukura Victory Sport.

Mu yindi mikino yabaye kuri uyu wa kabiri tariki 04/11/2014, Amagaju yanganirije na AS Kigali 0-0 i Nyamagabe. Ku Kicukiro ikipe ya Sunrise imaze igihe gito yirukanye umutoza yatsinze Isonga ibitego 3-0.

Kuri uyu wa 05 Ugushyingo 2014, Police FC iheruka gutsindwa na Marines ibitego 3-1 irakira APR FC yatsinze Rayon Sport ibitego 2-1, umukino urabera ku Kicukiro.

Ikipe ya Musanze FC irakira Kiyovu Sport kuri Stade Ubworoherane i Musanze, mu gihe Etincelles yakira Gicumbi FC kuri stade Umuganda i Rubavu naho Rayon Sport ikakira Espoir kuri Stade Regional i Nyamirambo.

Kuri ubu APR iracyayoboye urutonde rw’agateganyo n’amanota 13, mu gihe Rayon iyikurikira n’amanota 10 naho Amagaju akaba ari ku mwanya wa 3 n’amanota 10.

Ikipe ya Marines imaze igihe ihagama ibihangange iri ku mwanya wa 11 n’amanota 7gusa ikaba ifite umwenda w’ibitego bibiri. Mukura Victor Sport iri ku mwanya wa nyuma n’amanota 2 gusa.

Safari Viateur