Mugunga Dieudonné (Burucaga) watozaga Kiyovu Sports yeguye nyuma yo kumara imikino 4 adatsinda

Ubuyobozi bwa Kiyovu Sports bwemeje ko umutoza wayo yasezeye ku mirimo yo gutoza iyi kipe ahabwa inshingano zo kujya mu kanama gashinzwe gushakira abakinnyi iyi kipe. Umutoza wungirije Ruremesha Emmanuel yasigaranye inshingano zo gutoza Kiyovu Sports.

Mugunga Dieudonné bita Burucaga muri iyi minsi yari afite umusaruro utari mwiza muri Kiyovu
Mugunga Dieudonné bita Burucaga muri iyi minsi yari afite umusaruro utari mwiza muri Kiyovu

Ikipe ya Kiyovu Sports yari imaze imikino ine idatsinda nyuma yo gutsindwa na Rayon Sports ku munsi wa 11 wa shampiyona aho yatsinzwe igitego 1-0, ku munsi wa 12 ikipe ya Kiyovu Sports itsindwa na Marines ibitego 2-1 mu mukino wabereye ku Mumena. Umunsi wa 13 nabwo ntiyahiriwe na wo aho yatsinzwe na As Muhanga igitego 1-0 .

Umukino uheruka w’umunsi wa 14 ikipe ya Kiyovu Sports yakiriye Police itsindwa ibitego 3-1. Nyuma y’uyu mukino abafana ba Kiyovu Sports bavugirije induru uyu mutoza n’amagambo amusaba kwegura. Umutoza Burucaga yumvise icyifuzo cyabo ahitamo kubasezera.

Mugunga Dieudonné bita Burucaga abaye umutoza wa karindwi utandukanye n’ikipe ye nyuma ya Olivier Ovambe watozaga Mukura VS, Nduwantare Ismael watozaga Gicumbi FC , Seninga Innocent wasezeye muri Etincelles , Justin Bisengimana wirukanywe muri Bugesera, Niyongabo Amars watozaga Musanze , na Stephan Johanson watozaga Heroes.

Burucaga asize Kiyovu Sports ku mwanya wa gatandatu, aho ifite amanota 19, mu mikino 13 Kiyovu Sports yatojwe na Burucaga yatsinzemo 5 inganya imikino 4 itsindwa imikino 5, muri iyi mikino yatsinzemo ibitego 15 itsindwamo 14.

Burucaga yari amaze amezi atanu yonyine ahawe inshingano zo gutoza Kiyovu Sports.

Mugunga Dieudonné bita Burucaga ubanza ibumoso yeguye. Ruremesha Emmanuel (hagati) ni we wasigaranye inshingano zo gutoza Kiyovu Sports
Mugunga Dieudonné bita Burucaga ubanza ibumoso yeguye. Ruremesha Emmanuel (hagati) ni we wasigaranye inshingano zo gutoza Kiyovu Sports

Ibinyujije ku mbuga nkoranyambaga, Kiyovu Sports yatangaje ko yakiriye ubwegure bw’umutoza mukuru Mugunga Dieudonné bita Burucaga wigeze no gukinira iyi kipe, gusa akaba yahawe izindi nshingano muri iyi kipe aho yashinzwe ibijyanye no kugura abakinnyi.

Inshingano z’umutoza mukuru zahawe Ruremesha Emmanuel wari usanzwe yungirije Burucaga.

Kwegura kwa Burucaga nk’umutoza mukuru wa Kiyovu bivuze ko hafi icya kabiri cy’abatoza bakuru b’amakipe yo mu cyiciro cya mbere bamaze kwirukanwa cyangwa kwegura mu makipe yabo mu gihe imikino ibanza ya Shampiyona itararangira.

Umutoza Eric Nshimiyimana wa AS Kigali na we ni umwe mu batoza bari ku gitutu kubera umusaruro w’iyi kipe imaze gutsinda imikino ibiri yonyine mu mikino 14.

MENYA UMWANDITSI

National Football League 2019/2020

kigalitoday android app mobile

Ibitekerezo   ( 1 )

ERIC WA AS KIGALI ARI KU GITUTU CYANDE ? KERETSE NIBA ARI KI GITUTU CY ABANYAMAKURU KUKO NTA KIBAZO AFITANYE N UBUYOBOZI BWA AS KIGALI.AS KIGALI NTA BAFANA IGIRA NGO ABE ARI BO BAMWOTSA IGITUTU .ABANYAMAKURU MUMUSSHAKAHO IKI ?

RUTO yanditse ku itariki ya: 17-12-2019  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka