Suarez, usanzwe ataha izamu mu ikipe ya Liverpool, yarumye Chiellini ubwo barwaniraga umupira mu kibuga, akaba we n’Ishyirahamwe ry’umupira w’amaguru muri Uruguay, basabwe na FIFA kuba bamaze gutanga ibisobanuro ku makosa uwo mukinnyi yaraye akoze bitarenze saa tanu z’ijoro kuri uyu wa gatatu tariki ya 25/6/2014.

N’ubwo uko kurumana kwa Suerez bitabonywe n’umusifuzi Marco Rodriguez ukomoka muri Mexique, FIFA yo yamaze gutangaza ko igomba kugira icyo ibikoraho kuko izifashisha amashusho, ubuhamya ndetse n’ubundi bushakashatsi kugirango ifate icyemezo gikwiriye ibyakozwe na Suarez.

Bimwe mu bihano bishobora gufatirwa Suarez harimo kutongera gukina iki gikombe cy’isi, nk’uko byagendekeye uwitwa Mauro Tassotti wakiniraga Ubutaliyani mu gikombe cy’isi cyo mu 1994, ubwo yahanishwaga guhagarikwa imikino umunani nyuma yo kuvuna izuru rya Luis Enrique wakiniraga Espagne, kikaba ari nacyo gihano kinini kugeza ubu FIFA imaze gutanga.

Ariko bitewe n’uko umupira w’amaguru ku isi uyoborwa na FIFA, kandi, uretse no mu gikombe cy’isi Luis Suarez akaba yararanzwe no kuruma abandi bakinnyi mu mashampiyona yakinnyemo nk’Ubuholandi n’Ubwongereza, igihano cye gishobora kugera ku guhagarikwa imyaka ibiri kuko ari nacyo gihano kinini FIFA ishobora gutanga kugeza ubu.

Kuruma Chiellini byabaye nyuma y’aho Surez yari yararumye Branisav Ivanovic wa Chelsea, ubwo Liverpool yari yakinnye nayo muri Mata 2014, icyo gihe yahanishijwe kudakina imikino 10, ndetse asaba imbabazi avuga ko amakosa yakoze adakwiye umuntu ukina umupira w’amaguru kandi ko atazabyongera.

Icyo gihe abikora ariko ntabwo byari ubwa mbere kuko agikina muri Ajax Amasterdam mu Buholandi, mu Ugushyingo 2010, nabwo yarumye umukinnyi witwa Ottman Bakkal wakinaga muri PSV Eindhoven maze ahanishwa kudakina imikino irindwi ya shampiyona, none harimo kurebwa igihano aza gufatirwa nyuma yo kuruma Giorgio Chiellini.

Theoneste Nisingizwe