Impamvu nyamukuru itera ihangana hagati y’ayo makipe ni uko Les Onze du Dimanche yashinzwe n’abantu bari biyomoye kuri Magic FC, ariko mu mikino yose ayo makipe yakinnye Magic ntiratsinda mukeba wayo na rimwe.

Umukino w’ayo makipe ukunze no kurangwa n’impaka nyinshi zitangira mbere y’uko umunsi wo gukina ugera maze ugasanga abatuye umujyi wa Muhanga bose babukereye baje kwihera ijisho, ariko bikagaragara ko Les Onze du Dimanche ikunzwe cyane ku birebana n’abafana.

Hakunze kandi kuvuka impaka nyinshi ku misifurure y’umukino w’ayo makipe kubera ko abasifuzi babihuguriwe bo mu mujyi wa Muhanga usanga barabaye muri imwe cyangwa iyindi muri ayo makipe, kuburyo abayobozi bateguye imikino bagomba kwiyizira kuhahagarara.

Bamwe mu bakinnyi bazwi ko bagacishijeho muri ruhago bo muri ayo makipe twavuga nka Karahamuheto Jean Baptiste, Rumumba Sausthene( umutoza wa AS Muhanga), Nzayisenga Desire n’abandi bo muri Magic FC. Janvier bita Rubarara (APR), Sebazungu Mbaga (Flash FC), Bisengimana Germain (Rwanda B), Muganza Jean baptiste (Flash FC), Uwimana Fernand (Espoir) n’abandi bo muri Les Onze du Dimanche.

Ku mukino wahuje ayo makipe tariki 11/11/2012 muri ½ cy’amarushanwa yateguwe mu rwego rwo kwizihiza isabukuru y’imyaka 25 y’umuryango FPR-Inkotanyi byabaye ku nshuro ya kabiri ayo makipe agera ku munota wa nyuma anganya ibitego maze bakitabaza za penaliti.

Hifashishijwe kamera (camera) mu gufata amashusho mu rwego rwo gukemura amakimbirane, ndetse ikaba yaranagize akamaro ubwo umukinnyi wa magic yahushaga penaliti ariko akabeshya ko yayinjije. Umukino warangiye Les Onze du Dimanche itsinze Magic FC kuri penaliti 4 kuri 2.

Muri uwo mukino hagaragayemo guhuzagurika kw’abasifuzi ku buryo uwo ku ruhande yahakanaga ibintu uwo hagati akabyemeza kugeza no ku gitego cya 2 Les Onze du Dimanche yatsinze yishyura.

Umukino wa nyuma w’iryo rushanwa ukazahuza Les Onze du Dimanche n’ikipe yitwa Horizon y’ahitwa i Murambi mu murenge wa Shyogwe.

Ernest Kalinganire