Ibi umuyobozi w’akarere ka Nyanza yabitangaje nyuma y’amakuru amaze iminsi avuga ko ikipe ya Rayon Sports isanzwe iba mu mujyi wa Kigali, yaba igiye gusubira mu karere ka Nyanza aho yahoze mbere yo kwimukira i Kigali.

Mu ikipe ya Rayon Sports hamaze iminsi havugwamo ibibazo bitandukanye biterwa n’amikoro make birimo no gutinda guhemba abakinnyi.

Murenzi Abdallah we asanga iyi kipe niramuka ije mu karere ka Nyanza ibi bibazo bizashira ndetse Rayon Sports ikongera ikagira ishema. Ati “ni ikintu cyagarura ubuzima bw’umupira w’amaguru ukomeye mu karere, ni n’ibintu byagarura ubuzima bwo kureka kubaho bya mbarubukeye ku ikipe ya Rayon Sports. ”

Icyemezo cyemeza niba Rayon Sports izasubira i Nyanza cyangwa izaguma i Kigali kizafatwa mbere y’uko inama y’inteko rusange y’Ishyirahamwe ry’Umupira w’Amaguru mu Rwanda iterana tariki 09/09/2012.

Rayon Sports iramutse isubiye mu karere ka Nyanza siyo kipe isanzwe ikomeye mu Rwanda yaba ituye mu karere. Ikipe ya Mukura, imwe mu makipe amaze igihe kirekire akina mu cyiciro cya mbere cya shampiyona mu Rwanda ituye mu karere ka Huye naho ikipe ya Etincelles iri mu karere ka Rubavu.

Jacques Furaha