Nkuko ikinyamakuru cyandikirwa mu Buhinde The Times Of India kibitangaza, Constantine azerekanwa nk’umutoza mushya w’igihugu cy’Ubuhinde mu cyumweru tuzatangira kuri uyu wa mbere, aho biteganyijwe ko azajya ahembwa umushahara muke k’uwafatwaga nuwo asimbuye Wim Koevermans byavugwaga ko yahabwaga ibihumbi 20 by’amadorali ku kwezi.

Mu Rwanda, Constantine wari ufite gahunda yo kugeza ikipe y’igihugu ahantu heza mu mikino ya CHAN ya 2016, yari afite amasezerano y’imyaka ibiri amugenera umushahara ungana na $ 11,000 (Frw 7,469,000) ndetse akagenerwa n’ibindi bitandukanye birimo inzu yo guturamo, ndetse akaba yishyurirwa telefoni ye, ngo bimworohere kwitaba kwitaba telefoni zivuye hanze (rooming), agahabwa kandi amadorali 50 y’amanyamerika yo guhamagara buri kwezi.

Amakuru agera kuri Kigali Today atangaza ko uyu mutoza yari amaze iminsi atumvikana n’ubuyobozi bwa Ferwafa aho umwe mu bari inshuti ze za hafi mu Rwanda yanatubwiye ko mu minsi ishize byarushijeho kuba bibi nyuma yo kutagerana ku mwanzuro w’imyenda ikipe y’igihugu yagombaga kwambara.

Constantine, akaba atarishimiye uburyo yamaze amezi ane atari yabona umushahara we mu ikipe y’igihugu, ndetse yagiye adakunda kuvuga rumwe n’ubuyobozi bwe ku bijyanye n’ibyemezo bitandukanye harimo n’imikino ya gicuti.

Aganira na Kigali Today, umuvugizi w’ishyirahamwe ry’umupira w’amaguru mu Rwanda (Ferwafa), Mussa Hakizimana, yatangarije ko ibintu batumvikanagaho na Constantine bidakomeye cyane gusa yirinda kuvuga niba koko uyu mutoza yagiye Buhinde.

“Ntabwo nakwemeza ko yagiye kuko nanubu ndacyagerageza kuvugana n’abayobozi ngo numve niba yaboherereje ibaruwa “isezera””.

“Ni byo hari ibyo tutagiye twumvikanaho na Constantine ahanini bitewe nuko kenshi yasabaga ibintu bitahita bikunda vuba ndetse akananirwa kwihangana.
Aramutse yagiye twahita dushyira umwanya ku isoko tugashaka undi”.

Hakizimana Mussa watangaje ko uyu mutoza afite uburenganzira bwo kugenda igihe ashakiye ugereranyije n’amasezerano ye, yirinze kuvuga ibyo bintu atagiye yishimira binashobora kuba intandaro y’igenda rye.

Constantine yatoje u Buhinde hagati y’imyaka ya 2002 na 2005 aho yashoboye kubazanira Nike yabahaga miliyoni 5 z’ama pound (5 000 000 000 Frw). Constatine kandi yafashije Ubuhinde gutwara irushanwa ryabo rya mbere mu myaka 42, ubwo batsindaga Vietnam yari yababanje ibitego bibiri ku mukino wanyuma w’igikombe cya LG