Shampiyona y’u Rwanda yahagaritswe mu gihe ikipe y’igihugu Amavubi idafite umukino wo gushaka itike y’igikombe cy’isi kuko yamaze gusezererwa, ndetse nta n’umukino wa gicuti izakina mu mpera z’icyi cyumeru.

Umunyamabanga mukuru w’Ishyirahamwe ry’umupira w’amaguru mu Rwanda, Michel Gasingwa, avuga ko bafashe icyemezo cyo kudakina shampiyona bagendeye ku mabwiriza asanzwe ya FIFA avuga ko amakipe yose (clubs) agomba kurekura abakinnyi bayo bakajya gukinira ibihugu byabo ku matariki yemejwe na FIFA.

N’ubwo ikipe y’u Rwanda itazakina ku mpera z’icyi cyumweru, Gasingwa avuga ko hari bamwe mu bakinnyi bakina mu Rwanda ariko b’abanyamahanga bashobora kwifuzwa n’amakipe yabo y’ibihugu kuri iyo tariki, kandi ngo ntabwo bababuza, kuko ari uburenganzira bwabo.

Ikindi kandi, Gasingwa avuga batari kureka amakipe amwe ngo akine andi ntakine kubera ko bakinnyi bayo bagiye mu makipe y’ibihugu byabo, bahitamo guhagarika imikino yose.

Mu gihe andi makipe azaba arimo gukina imikino yo gushaka itike yo kuzajya mu gikombe cy’isi, u Rwanda rwakagombye kuba narwo rukina imikino ya gicuti rwitegura andi marushanwa azaba mu minsi iri imbere, ariko Umunyamabanga mukuru wa FERWAFA avuga ko babuze amakipe yandi bakina nayo.

Hagati aho, FERWAFA irimo gushakisha umukino wa gicuti n’amakipe atandukanye hirya no hino muri Afurika, uwo mukino nuboneka ukazakinwa mu Ugushyingo, mbere y’irushanwa rya CECAFA u Rwanda ruzitabira mu mpera z’uko kwezi i Nairobi muri Kenya.

Shampiyona izakomeza ku wa gatandatu tariki 19/10/2013, icyo gihe amakipe azaba ageze ku munsi wa gatatu wa shampiyona. Shampiyona isubitswe APR FC ariyo iyoboye urutonde rw’agateganyo n’amanota 6.

Theoneste Nisingizwe