Impamvu nyamukuru yatumye kubazwa kwa Ntagwabira gusubikwa ni uko nyiri ubwite atabashije kuboneka kuko atari mu Rwanda; nk’uko bisobanurwa n’Umunyamabanga mukuru wa FERWAFA Michel Gasingwa uretseko igihugu aherereyemo kitatangajwe.

Yabisobanuye muri aya magambo: “Gahunda yari uyu munsi ku wa mbere, ariko ejo hashize nibwo twaje kumenya ko Ntagwabira ubu atari mu Rwanda kuko nawe ubwe yarabitumenyesheje, bituma gahunda tuyimurira ku wa kabiri kuko azaba yamaze kugaruka, ariko amasaha n’aho bizabera ntagihindutse”.

Gasingwa wirinze kuvuga byinshi ku bijyanye n’iki kibazo cya Ntagwabira wemera ko yatanze ruswa, yavuze ko byose bizamenyekana ubwo azaba amaze guhatwa ibibazo kuri uyu wa kabiri tariki 17/07/2012 guhera saa tanu za mu gitondo.

FERWAFA yatumije Ntagwabira kujya kwisobanura nyuma y’aho Ntwagwabira we ku giti cye yivugiye ko muri 2010 yigeze gutanga ruswa ubwo ikipe ya Kiyovu Sport yatozaga icyo gihe yakinaga na Rayon Sport yatozwaga na Kayiranga Baptiste.

Ntagwabira yivugira ko yatanze amafaranga ayaha abakinnyi ba Rayon Sport kugira ngo baze gukina nabi maze batsindwe, icyo gihe koko Kiyovu yatsinze Rayon Sport mu buryo budasobanutse binaviramo Kayiranga Baptste wayitozaga gusezererwa, anatukwa n’abafana bayo ahita asimburwa na Jean Marie Ntagwabira.

Nyuma yo guhatwa ibyo bibazo, Ntagwabira nahamwa na ruswa, ashobora kuzakurikiranwa n’inzego z’igihugu zishinzwe kurwanya ruswa, bikaba bivugwa ko yanahita asezererwa mu ikipe y’igihugu nkuru aho yari umutoza wungirije.

Theoneste Nisingizwe