Ibi ikipe ya FC Barcelone yabigezeho nyuma y’aho yari yatsindiwe mu gihugu cy’Ubutaliyani mu mukino ubanza ibitego 2-0 n’ikipe ya Milac AC ku kibuga cyayo cya San Siro.

Iyi kipe ikaba yahinduye amateka ubwo yishyuraga ibitego byose yatsinzwe n’iyi kipe ya Milan AC ikongeramo n’ibindi bibiri, bityo igashimangira intsinzi yayo iyinjiza bidasubirwaho mu mikino ya ¼ cy’irangiza mu marushanwa y’amakipe yabaye aya mbere iwayo ku mugabane w’uburayi “Uefa champions league” isezereye ikipe ya Milan AC byahatanaga.

Ibitego by’ikipe ya FC Barcelone bikaba byatsinzwe na kizigenza wayo Lionel Messi watsinzemo ibitego 2, David villa yaje kongeramo icya 3, naho ku munota wa 91 uwitwa Manuca ashyiramo icy’agashinguracumu ari nacyo cya kane muri uwo mukino.

Ku wundi mukino wabaye, ikipe ya Schalke-04 yo mu Budage ikaba yasezerewe n’ikipe ya Galatasalay yo muri Turukiya ku bitego 4-3 mu mikino yombi. Mu mikino ibanza ikipe ya Galatasalay ikaba yari yaranganije na Schalke-04 igitego 1-1, uwo kwishyura Galatasalay igatsinda ibitego 3-2.

Kugeza ubu amakipe nka FC Barcelone, Real Madrid yombi yo muri Espagne, Juventus yo mu Butaliyani, Paris Saint Germain yo mu Bufaransa, Galatasalay yo muri Turukiya na Borussia Dortumund yo mu Budage zikaba zimaze gukatisha amatike yazo yerekeza muri ¼ cy’imikino ya nyuma mu irushanwa rya Uefa champions league ku mugabane w’Uburayi.

Kuri uyu mugoroba ikipe ya Bayern Munich yo mu Budage ikaba iza gukina na Arsenal yo mu Bwongereza ku kibuga cya Bayern Munich Arianz Arena. Mu mukino wabereye mu Bwongereza Arsenal ikaba yaratsinzwe ibitego 3-1. Ikipe ya Malaga yo muri Espagne iraza guhura na FC Porto yo muri Portugal. Amakipe abiri aza kurokoka muri iyi mikino isigaye araza kwiyongera kuyamaze gutsindira itike yayo yo kujya muri ¼ .

Safari Viateur