Ikipe y’u Rwanda yageze i Libreville ku wa kane, ihita inakora imyitozo ya mbere. Umutoza n’abakinnyi bavuga ko ari nta kibazo bafite kuko ngo bakiriwe neza, gusa umutoza Richard Tardy avuga bafite ikibazo cy’ubushyuhe bwinshi ariko bagomba kubwimenyereza mbere y’umukino kugirango butazababangamira.

Ati “Abakinnyi bameze neza uretse ubushyuhe bwinshi, ariko ntabwo bwadutunguye kuko twaje tubizi, ndetse mu Rwanda twari tumaze iminsi dukora imyitozo ku zuba kugirango turimenyere. Intego ituzanye ni ugutsinda, kandi nyuma yo kunganya ubusa ku busa i Kigali, naganirije abakinnyi banjye kandi n’ubu nibyo nkirimo kubabwira, bagomba gukina umupira ari nta gihunga kuko Gabon iri mu rugo ariyo izaba isabwa byinshi n’abakunzi bayo”.

Muri uwo mukino uba kuri uyu wa gatandatu tariki 24/5/2014, ikipe y’u Rwanda irasabwa gutsinda nibura igitego 1-0 igakomeza mu cyiciro cya nyuma cy’ayo majonjora. Tardy avuga ko kugirango ibitego biboneke bisaba ko abakinnyi be basatira bazubahiriza amabwiriza amaze iminsi abaha kuko ngo babyitoje bihagije muri iyi minsi.

“Icya mbere ni ukumenye icyo ukoresha umupira iyo uwuhawe imbere y’izamu. Muri iyi minsi twakoze imyitozo myinshi yo kwiga gutsinda kandi abakinnyi banjye barayumvise ku buryo twizera ko kuri uyu wa gatandatu bazabishyira mu bikorwa,” Richard Tardy.

Ikipe ya Gabon isabwa gutsinda byanze bikunze nayo, umutoza wayo Rigobert Nzamba yavuze ko nta kosa na rimwe bagomba gukora imbere y’ikipe y’u Rwanda muri uwo mukino uzabera kuri stade Monedan iherereye mu gace kitwa Sibang.

Mu rwego rwo kongera ingufu mu ikipe ye, umutoza wa Gabon, yahamagaye abakinnyi Kevine Owane na Laccruche Alianga bakina mu gihugu cy’Ubufaransa.

Ikipe izakomeza hagati y’u Rwanda na Gabon izakina umukino wa nyuma w’amajonjora hagati ya Ghana na Sierra Leone, itsinze muri icyi cyiciro ihite ijya mu gikombe cya Afurika kizabera muri Senegal muri Werurwe 2015.

Theoneste Nisingizwe