Mukura ifite umutoza mushya Ruremesha Emmanuel usabwa kwitwara neza ngo abone akazi karambye. Ruremesha avuga ko bigoye kwitwara neza kuri Kamena. Ati “iki kibuga ntiwakimenyera kuko no mu myitozo kiratugora”.

Ubwo Ruremesha yatozaga La Jeunesse yatsinzwe igitego kimwe ku busa na Mukura tariki 07/03/2012 maze atangaza ko yazize ikibuga kibi.

Ruremesha avuga ko bifuza kugera ku mukino wa nyuma. Ati “iyo umutoza cyangwa abakinnyi bitwaye neza bibaha gukomeza akazi”.

Umukino uzayoborwa n’umusifuzi wo hagati Ishimwe Jean Claude. Muri shampiyona amakipe yombi yanganyije igitego kimwe kuri kimwe kuri stade Kamena tariki 5/5/2012.

Muri 2007 ikipe ya AS Kigali yatsinze Mukura igitego kimwe ku busa mu mikino y’itsinda rya gatatu maze iba ariyo ikomeza.

Mu myaka irindwi ishize Mukura yatsindiwe ku mukino wa nyuma w’igikombe cy’amahoro kabiri. Mu 2005 yatsinzwe na Rayon Sport ibitego bitatu ku busa naho mu 2009 itsindirwa ku mukino wa nyuma na ATRACO igitego kimwe ku busa.

Muri 2001 ikipe ya Les Citadins yatwaye igikombe cy’amahoro nyuma yo gutsinda penaliti 6 kuri 5 za APR FC. Iyi niyo yaje kwivanga na Rennaissance maze biba AS Kigali.

Mukura yarangije shampiyona ya 2012 iri ku mwanya wa gatatu .Naho mu gikombe cy’amahoro 2011 yageze muri ½ itsindwa na Police FC ibitego bitandatu kuri kimwe.

Indi mikino kuwa kane tariki 21/6/2012 Marines yabujije Police igikombe bizahurira kuri stade Umuganda saa 15h30. APR FC ifite iki gikombe izakina n’ishuri ry’umupira w’amaguru SEC saa 15h00 kuri stade Amahoro.

Kiyovu Sport y’umutoza Kayiranga Baptista izahura na Rayon sport kuri stade Amahoro saa 17h00.Mu mukino wa shampiyona Kiyovu yatsinze Rayon Sport igitego kimwe ku busa.

Thierry Tity Kayishema