Ni ibirori byatangiye ku isaha ya Saa kumi n’Ebyiri z’umugoroba, byitabiriwe n’abanyacyubahiro batandukanye ndetse n’abafite aho bahuriye na ruhago barimo abanyabigwi nka Rudasingwa Longin watoje Rayon Sports n’Amavubi ndetse na Murangwa Eugene wabaye umunyezamu ukomeye muri Rayon Sports ndetse n’Amavubi.

Muri ibi bihembo bitanzwe ku nshuro ya kabiri, haba hahanzwe amaso utwara igihembo cy’umukinnyi mwiza w’umwaka. Muri iki cyiciro hari hahanganye Girumugisha Jean Claude na El Hadji Madick Kane ba Al Hilal SC, Djibril Ouattara na Byiringiro Jean Gilbert ba APR FC ndetse na Mbonyumwami Taiba wa Marine FC.

Iki gihembo cyegukanywe n’Umurundi Girumugisha Jean Claude watsinze ibitego icyenda(9) anatanga imipira 14 yavuyemo ibitego nk’uko imibare ya BK Pro League ibigaragaza mu mikino 16 ya shampiyona yakinnye muri rusange. Ibi yakoze byamuhesheje iki gihembo kiniyongeraho imodoka ifite agaciro ka miliyoni 15 Frw.

Mu bindi bihembo, umunyezamu mwiza yabaye James Desire Djaoyang wa Kiyovu Sports wakinnye imikino 29 yose yabanjemo, agasoza 17 muri yo nta gitego yinjijwe aho igihembo yagishyikirijwe na Ndayishimiye Eric ’Bakame’ wabaye umunyezamu w’Amavubi.

Umukinnyi mwiza ukiri muto yabaye Emmanuel Flomo watsinze ibitego 12 muri shampiyona aho iki gihembo yagishyikirijwe na Rutanga Eric wabaye umukinnyi w’Amavubi n’amakipe atandukanye inyuma ku ruhande rw’ibumoso.

Rutahizamu Djibril Ouattara wa APR FC yahawe igihembo nk’umukinnyi mwiza watsinze ibitego byinshi aho mu mikino 19 yakinnye yatsinzemo ibitego 18 anatanga imipira itatu yavuyemo ibitego.

Muri ibi bihembo kandi hatanzwe igihembo cy’igitego cyiza cya shampiyona 2025-2026 cyegukanwe na Rutonesha Hesbone ukinira Gorilla FC aho iki gitego yagishyikirijwe na Sugira Ernest wahoze ari rutahizamu w’ikipe y’igihugu y’u Rwanda ’Amavubi’.

Umutoza Laurențiu Reghecampf watozaga Al Hilal SC 2025-2026 ariko akaba yaragiye gutoza Espérance Sportive de Tunis yo muri Tunisia niwe wahembwe nk’umutoza mwiza nyuma yo gutwara igikombe cya shampiyona.

Muri ibi bihembo kandi hanatoranyijwe abakinnyi 11 beza baranze shampiyona barimo umunyezamu James Desire wa Kiyovu Sports, Byiringiro Jean Gilbert Kagege na Djibril Ouattara ba APR FC, Nsita Luzolo Ernest na Mustafa Karshoum, Girumugisha Jean na El Hadji Madick Kane na Al Hilal, Joseph Sackey wa Mukura VS, Daba Sogoba wa Al Merriekh SC, Mbonyumwami Taiba wa Marine FC ndetse na Gilles Razafimaro wa Al Merriekh SC.