FC Seville yahagaritse umuvuduko wa Real Madrid muri shampiyona iyigira iya gatatu

27-03-2014 - 15:37' | Ibitekerezo ( )

Nyuma y’iminsi mike yari imaze ku mwanya wa mbere muri shampiyona y’umupira w’amaguru muri Espagne, ikipe ya Real Madrid yahagaritswe umuvuduko na FC Seville yayakiriye ikayitsinda ibitego 2-1 mu mugoroba wo kuwa 26/03/2014.

Real Madrid yatsinzwe ku nshuro ya kabiri zikurikiranye byayigizeho ingaruka kuko ikimara gutsindwa mu cyumweru gishize na FC Barcelone ibitego 4-3, yahise iva ku mwanya wa mbere yariho ijya ku wa kabiri.

Sevilla yishimiye cyane insinzi yabonye imbere y'ikipe ya Real Madrid.

Kongera gutsindwa 1-2 na FC Seville kuwa 26/03/2014 byatumye ihita igera ku mwanya wa gatatu muri shampiyona ya Espagne, aho ikipe ya Atletico Madrid yakomeje gushimangira umwanya wa mbere iriho imaze gutsinda Granada igitego 1-0.

Ikipe ya FC Barcelone yarushijeho kurya isataburenge iya Atletico Madrid kuko ubu iyirusha inota rimwe gusa. Atletico Madrid ifite amanota 73; FC Barcelone ikaba iya kabiri n’amanota 72 naho Real Madrid ikaba iya gatatu n’amanota 70.