Drogba ashobora kuva vuba muri Chelsea

22-05-2012 - 10:20' | Ibitekerezo ( 1 )

Penaliti y’intsinzi yateye ku mukino wa nyuma wa Champions League ishobora kuba inshuro ya nyuma Didier Drogba akinnye yambaye imyenda y’ubururu ya Chelsea; nk’uko yabitangarije bagenzi be kuri iki cyumweru.

Drogba w’imyaka 34 yageze muri Chelsea mu 2004 aguzwe milioni 24 z’amapound. Kuri uyu wa gatandatu tariki 19/05/2012 yatangaje ko yari asigaje igikombe cya Champions League yategereje iyi myaka yose. Mu gihe asigaje ukwezi kumwe ngo arangize amasezerano yasabye ko yakongeraho imyaka 2 nyamara ubuyobozi bwa Chelsea burashaka kumuha umwaka umwe gusa.

Nubwo ataratangaza aho azerekeza, ikipe yo mu gihugu cy’u Bushinwa, Shanghai Shenhua, iri kumuha umushahara w’ibihumbi 250 by’amapound ku cyumweru. Iyi kipe ikinamo Nicolas Anelka wakinanye na Drogba muri Chelsea.

Mu mikino 226 rutahizamu w’ibihe byose wa Cote d’Ivoire, Didier Drogba, yakiniye The Blues (Chelsea) yayitsindiye ibitego 100.

Imyaka yose amaze muri Chelsea, Drogba ngo yari ategereje igikombe cya Champions League.

Uretse Drogba ushaka kuvamo, Torres na we ngo ntiyishimiye uburyo akina ndetse n’umwanya yahinduriwe.

Mu gihe hari bayivamo Chelsea iri gushaka abandi batahizamu nka Ramadel Falcao ukinira Atletico Madrid, Hulk wa FC Porto na Edinson Cavani wa Napoli. Kuba kandi Tottenham itazakina imikino ya Champions League ngo abakinnyi nka Modric na Bale bashobora gusanga bakeba babo bo mu majyaruguru y’umujyi wa Londres (Chelsea).

Nubwo yatwaye ibikombe bibiri (Champions League na FA Cup), umutoza Roberto Di Mateo wasimbuye Andreas Villas Boas nawe ategereje kuvugana n’ubuyobozi niba yahabwa iyi kipe burundu nk’uko abakinnyi n’abayikinnyemo bakomeje kubisaba.

Mu myaka umunani 8 Roman Abrahimovich aguze Chelsea amaze kwirukana abatoza 8.

Thierry Kayishema