Ni umukino urangiye mu buryo abantu batari biteze kuko hari abizeraga ko Djibouti ari ikipe yoroshye gutsinda, ibintu umutoza w’ikipe y’Igihugu (Amavubi), Frank Spittler atigeze yemera na gato.

Uyu mutoza ariko nawe mu bakinnyi be yabanje mu kibuga yakoze impinduka ku myanya yabo, aho Ruboneka Jean Bosco yakinaga hagati yugarira, Arsene Tuyisenge akina hagati asatira mu gihe impande zanyuragaho, Niyibizi Ramadhan iburyo na Dushiminana Olivier ibumoso rutahizamu ari Iyabivuze Osee.

Mu mikinire nta kintu kidasanzwe Amavubi yerekanaga nkuko abantu bari babyiteze imbere ya Djibouti, kuko nayo yari ifite abakinnyi nka kapiteni wayo, Abdi Ildeh wari hagati, Mahamoud Elabeh ndetse na Hassan Hussein bageragezaga kwitwara neza, nubwo bataburaga gutakaza imipira bya hato na hato gusa ariko nanone abasore b’Amavubi, nabo ntibayibyaze umusaruro kuko igice cya mbere cyarangiye ari 0-0 nta kipe kimwe iteye ishoti rigana mu izamu.

Igice cya kabiri kigiye gutangira, Niyibizi Ramadhan yavuyemo hajyamo Mugisha Gilbert wahise akina ibumoso Dushiminana Olivier ajya iburyo. Uburyo bwa mbere wakwita ko bukomeye, Amavubi yakinaga ibintu bisanzwe yabubonye ku munota wa 65, ubwo Byiringiro Gilbert wari umaze gusimbura Fitina Omborenga, yahaga umupira Dushiminana Olivier wakinnye iburyo mu gice cya kabiri ariko ateye ishoti rikomeye umunyeza Sulait Luyima awushyira muri koruneri.

Djibouti mu gice cya kabiri yari yatinyutse nyuma yo kubona imikinire y’Amavubi, ubona ko ihanahana neza ikanagera imbere y’izamu. Ku munota wa 79, yafunguye amazamu ku gitego cyatsinzwe na Gabriel Dadzie ku mupira yinjiranye mu ruhande rw’iburyo, maze aroba umunyezamu Niyongira Patience ku giti cy’izamu cya mbere atari yafunze. Ni igitego cyaciye igikuba muri Stade Amahoro biha imbaraga Djibouti yakomeje gukina neza.

Ku munota wa 88, Amavubi yabonye koruneri, umupira ushyizweho umutwe na Ndayishimiye Didier ukubita igiti cy’izamu uvamo, aho Djibouti yahise isatira byihuse ariko Nshimiyimana Yunussu aratabara.

Djibouti yakinnye neza kuko umupira wakiniwe cyane mu kibuga cy’Amavubi byatumye abafana batangira no kuyishyigikira kubera umupira mwiza yagaragazaga. Iminota 90 yongereweho ine (4), umukino urangira ari igitego kimwe cya Djibouti ku busa bw’Amavubi.