Ikipe ya Raja Casablanca yo Maroc nayo yasezereye ikipe ya Atletico Mineiro yo muri Brazil ikinamo umukinnyi Ronaldinho iyitsinze ibitego 3-1. Aya makipe yombi yatsinze akaba azahatanira igikombe ku mukino wa nyuma uzabera muri Maroc kuri stade ya Marrakech kuri uyu wa 21 ukuboza 2013.

Ni ku nshuro ya kabiri ikipe ya Raja Casablanka yo muri Maroc yitabiriye igikombe cy’isi cy’ama clubs gitegurwa na FIFA. Uretse iki yitabiriye muri 2013, ikaba iherutse kukitabira mu mwaka w’2000 muri Brazil nk’uko tubikesha arkomvoyages.over-blog.com. Naho ikipe ya Bayern Munich ikaba ari ikipe ya mbere yo mu Budage yitabiriye iri rushanwa.

Ikipe ya Guangzhou Evergrande yasezerewe na Bayern Munich, yatwaye igikombe cy’ama clubs cyo ku mugabane wa Asia naho Bayern Munich yagitwaye ku mugabane w’Uburayi.

Ikipe ya Athletico de Mineiro yo muri Brazil yo yatwaye igikombe cya 2013 cyo muri America y’Epfo kitwa “Copa Libertadoles de America”, ariko yahise nayo isezererwa mu gikombe cy’isi cy’ama clubs n’ikipe ya Raja Casablanca yo muri Maroc ku mugabane wa Afurika muri ½ .

Ikipe ya Bayern Munich yatwaye ibikombe byinshi bikomeye ku isi inafite amateka akomeye mu mupira w’amaguru mu Budage, ku mugabane w’Iburayi no ku isi muri rusange,niyo ihabwa amahirwe cyane yo kwegukana iki gikombe.

Ikipe ya Raja Casablanka yo muri Maroc, imbere y’abafana bayo nayo irifuza kubyaza umusaruro amahirwe yabonye yo gukinira mu gihugu iturukamo imbere y’abafana bayo, ikaba yatsinda Bayern Munich ku mukino wa nyuma ikegukana iki gikombe cy’isi cy’ama clubs.

Gusa benshi mu bakurikirana umupira w’amaguru ku isi n’abagize ibitekerezo batanga nyuma y’umukino wa ½ , usanga bavuga ko uyu mukino uzagora cyane ikipe ya Raja Casablanca nubwo izaba iri imbere y’abafana bayo.

Bayern Munich yo mu Budage ihagarariye u Burayi, Raja Casablanca yo muri Maroc ihagarariye ibihugu byo muri Afurika y’Amajyaruguru, ikipe ya Al Ahly SC yo muri Misiri yatwaye igikombe cy’Afurika cy’ama clubs, Guangzhou Evergrade ihagarariye umugabane wa Asia, Auckland FC ihagarariye umugabane wa Oceania, CF Monterrey yo muri Mexique ihagarariye umugabane wa Amerika y’Amajyaruguru na Caraibes zikaba arizo zitabiriye iri rushanwa.

Igikombe cy’isi cy’ama clubs cyo mu mwaka wa 2012 cyatwawe n’ikipe ya SC Corinthians yo muri Brezil itsinze Chelsea yo mu Bwongereza igitego 1-0.

Safari Viateur