Ibi Muhammad Shaban yabitangarije Kigali Today mu kiganiro cyihariye yagiranye nayo aho yayemereye ko Rayon Sports binyuze ku muntu acyeka ko ari Perezida bamuhamagaye akababwira agaciro ke anamurangira abo bakomezanya ibiganiro.

Ati "Barampamagaye, ndumva ari Perezida wampamagaye. Yaramvugishije mubwira agaciro kanjye ntakubwira wowe, ariko muhuza n’abampamagarariye ngo bavugane."

Uyu mugabo wayoboye abatsinze ibitego byinshi muri Uganda 2023-2024 n’ibitego 17 abajijwe niba abo yahuje na Rayon Sports baba baramubwiye ibyo bavuganye yavuze ko atabizi kuko nta yandi makuru yigeze abimenyaho.

Ati "Nababwiye kujya kuganira nabo ariko ntabwo nzi niba baraganiriye, ntabwo nakubwira ngo baganiriye iki kuko ntabwo namenye niba baranavuganye."

Abwiwe ko bivugwa ko mu minsi iri imbere ashobora kuba ari umukinnyi wa Rayon Sports, ashyenga yavuze ko bishobora kuzaba mu myaka iri imbere kuko ubu bigoranye kubera ubundi busabe afite bwiza.

Ati "Hahaha, birashoboka ko nazaza mu myaka iri imbere kuko ubu biragoye cyane. Mfite ubundi busabe bwiza cyane ngomba kwicara nkatoranya aheza ho kujya, ubu biragoranye cyane (Kuza mu Rwanda)."

Muhammad Shaban tariki 18 Nyakanga 2024, ni bwo yanditse ubutumwa ashimira ikipe ya KCCA ndetse n’abakunzi bayo abashimira uko babanye mu gihe cy’imyaka ibiri yari amaze abakinira.

Ubwo yasezeraga Kigali Today yabajije umwe mu bayobozi ba Rayon Sports niba bitaba bifite aho bihuriye no kuza muri iyi kipe ariko avuga ko atari byo.